Qazaq qyzy tuńǵysh ret Everest shyńyna shyqty
ALMATY. KAZINFORM – Quramynda Anar Býrasheva men Maqsat Jumaev bar «Kazakh Everest Team» qazaqstandyq komanda álemniń eń bıik shyńy – Everest shyńyna (8 848 m) sátti kóterildi. Bul týraly «Kazakh Everest Team» baspasóz qyzmeti málim etti.
Nepaldyń Gımalaıda kóterilýge mamandanǵan jáne qazaqstandyq ekspedıtsııanyń resmı jolserigi «Seven Summit Treks» kompanııasynyń habarlaýynsha, qazaqstandyq komanda 12 mamyr kúni Nepal ýaqytymen tańǵy saǵat 07:25-te Everest shyńyn baǵyndyrdy.
«8 000 metrden joǵary bıiktiktegi daýyl men boran túrindegi kúrdeli aýa raıy jaǵdaılaryna baılanysty shyńdy baǵyndyrýǵa nıettengen ekspedıtsııalardyń kópshiligi baǵytynan keri qaıtty, tek bes eldiń alpınısteri Everestke sátti kóterile aldy. Olardyń arasynda bizdiń otandastarymyz bar – tarıhta álemniń eń bıik shyńyna shyqqan tuńǵysh qazaq qyzy Anar Býrasheva jáne eńbegi sińgen qazaqstandyq alpınıst Maqsut Jumaev, bul onyń Everest shyńyna osymen úshinshi ret shyǵýy», - «Kazakh Everest Team» baspasóz qyzmeti.
Jalpy, «Kazakh Everest Team» komandasynyń shyńǵa kóterilýi bes táýlikke sozyldy: 7 mamyrda bazalyq lagerden (5 350 m.) shyǵýdan bastalyp, sodan keıin bizdiń alpınıster I Lager (6 100 m.) arqyly ótip, odan keıin II Lagerge (6 400 m.), III Lagerge (7 100 m.) kóterildi jáne IV Lagerge (8 000 m.) jetken soń odan ári Everest (8 848 m.)
Everest shyńyna Anar Býrasheva men Maqsat Jumaev Qazaqstan Respýblıkasynyń memlekettik týyn ornatty.
«Búgin, 12 sáýirde Anar men Maqsut IV Lagerde (8 000 m.) kúrdeli kóterilýden keıin tómen túsý úshin kúsh-qýatyn qalpyna keltirip jatyr. Alpınısterdiń jaǵdaıy qanaǵattanarlyq, biraq kúshi sarqylyp, bazalyq lagerge túsý úshin biraz jınaqtalýy kerek bolyp tur»,- dep atap ótti «Kazakh Everest Team».
Buǵan deıin qazaqstandyq alpınıster 6186 metr bıiktikte jattyǵý júrgizip jatqany týraly jazǵan edik.
