Qazaq qyzy Frantsııa Senatyna saılaýǵa túsip jatyr

Keıbireýler óziniń qazaq ekenin dáleldeı almaıdy. Astanada ótip jatqan «Otandastar» forýmynda sóz sóılegen etnıkalyq qazaq, Frantsııanyń Kreı qalasy meriniń orynbasary Esım Savash osylaı málim etti, dep habarlaıdy Kazinform. 

«Frantsııada shamamen 13 jyldan beri jumys istep kelemin. 2014 jyly men qalalyq basqarý organdarynda qyzmetke aralastym. Sodan keıin qala ákiminiń orynbasary bolyp saılandym. Bıyl men Kreı qalasy jastarynyń máselesin jetkizý úshin bar kúshimdi saldym, endi ony Senatqa jetkizgim keledi. Jastar óz kózqarasyn jaqsy jaqqa ózgertip, saıasatqa aralasyp, álemniń damýyna úles qosýǵa múmkindigi bar. Qazaqstanda Eýropadaǵy qazaqstandyq jastar úshin jańa jobalar qolǵa alynǵanyn bilemin», - dedi Esım Savash forýmda sóılegen sózinde.

Bul rette Esım Savash «Ata joly» kartasyn jáne Qazaqstan azamattyǵyn alý tártibinde kúrdeli máseleler bar ekenin atap ótti.

«Basty máseleniń biri - keıbireýler óziniń qazaq ekenin dáleldeı almaıdy. Osyndaı másele kóp qazaqtyń basynda bar. Sondyqtan qazaqstandyq tarap bul problemany júıeli túrde sheshse eken», - deıdi Kreı qalasy meriniń mádenıet máseleleri boıynsha orynbasary Esım Savash. 

Toqtala ketsek, qazirgi ýaqytta Esım Savash Frantsııa Senatyna saılanatyn úmitkerlerdiń qatarynda.