Qazaq qyzy bokstan úsh márte Reseı chempıony atandy

ASTANA. KAZINFORM – Ombylyq qazaq qyzy Saltanat Medenova Serpýhov qalasynda (Máskeý oblysy) bokstan áıelder arasynda ótken 25-inshi Reseı chempıonatynda jeńimpaz atandy.

Saltanat 81 kelige deıingi salmaqta fınalda Krasnodar ólkesiniń ókili, ótken jylǵy álem chempıony Anastasııa Demýrchıandy utty.

Osylaısha, S.Medenova úsh dúrkin Reseı chempıony atandy.

«Álem chempıony Anastasııa Demýrchıanmen ótken fınaldyq jekpe-jek eń aýyr aıqastyń biri boldy. Psıhologııalyq jaǵynan biraz qıyndyqqa túskenimen, rıngke shyqqannan keıin jeńildep sala berdim. Anastasııanyń meniń salmaǵyma ótkenin bildim. Sondyqtan oǵan daıyndaldym. Men úsh dúrkin Reseı chempıony atandym. Tezirek úıge jetip, týystarymdy, anamdy qushaqtaǵym keledi», dedi Saltanat Medenova.

Reseı birinshiligine 48 óńirden 172 sportshy qatysyp, baq synady.

Omby qalasynda týyp-ósken Saltanat Medenova bıyl BRIKS oıyndarynda da altynnan alqa taqqan bolatyn.

Eske sala keteıik, budan buryn Qazaqstan boks federatsııasynyń World Boxing quramyna engenin jazǵan edik.