Qazaq qyzy bokstan ekinshi ret Reseı chempıony atandy

Bashqurtstan astanasy Ýfa qalasynda bokstan áıelder arasynda Reseı chempıonaty máresine jetti, dep habarlaıdy Kazinform.

Reseı boks federatsııasynan alynǵan málimetke qaraǵanda, segiz kúnge sozylǵan dodaǵa 49 óńirden 174 sportshy qatysyp, baq synady. Ombylyq qazaq qyzy Saltanat Medenova 81 kg salmaqta úzdik shyqty.

Saltanat jartylaı fınalda eki dúrkin álem jáne Eýropa chempıony, Tokıo olımpıadasynyń qola júldegeri, daǵystandyq Zenfıra Magomedalıevadan tóreshilerdiń biraýyzdan sheshimimen aılasyn asyrdy.

Sońǵy básekede qazaq qyzy nıjegorodtyq Evgenııa Molochkovany úshinshi raýndta eki ret nokdaýnǵa jiberip, aıqyn basymdylyqpen utty – 5:0.

«Fınaldaǵy qarsylasymmen osyǵan deıin úsh ret kezdesip, bárinde de ony qapy qaldyrdym. Búgin tórtinshi jekpe-jek aýyrlaý tıetindikten, oǵan tyńǵylyqty daıyndaldym. Eń qıyn báseke jartylaı fınalda Zenfıra Magomedalıevamen boldy. Bul utys men úshin óte mańyzdy edi. Osy chempıonatta men jeńiske jetýge tyrystym. Óıtkeni Reseı birinshiligin 2021 jyly utqan edim. Al 2022 jyly qola júldeni qanaǵat tuttym», - dedi S.Medenova.

Jarys jeńimpazdaryna 1,5 mln rýbl kóleminde sertıfıkat berildi.

Aıta keteıik, Saltanat 2021 jyly jeltoqsanda Chelıabide ótken Reseı chempıonatynda jeńimpaz atanyp, Omby áıelder boksy tarıhynda alǵashqy altyn medaldi oljalaǵan bolatyn.