Qazaq qyzy alǵash ret Soltústik buǵazyn júzip ótti
ORAL. KAZINFORM – Batys Qazaqstan oblysynyń týmasy Ánel Sytdyqova Irlandııa men Shotlandııa arasyndaǵy Soltústik buǵazyn júzip ótken alǵashqy qazaqstandyq áıel atandy. Áneldiń ózi Instagram áleýmettik jelidegi paraqshasynda málim etkenindeı, ol atalmysh buǵazdy 4 qyrkúıek kúni 16 saǵat 36 mınýt 19 sekýndta baǵyndyrdy.
Otandasymyz Soltústik buǵazyn júzip ótken 185 adamnyń qataryna endi.
– Tórt adamnyń bári de márege jetti. Menimen birge bolǵan germanııalyq, Olımpıada chempıony Andreas 8 saǵatta júzip ótip, rekord ornatty. Al aýstralııalyq Brenda 11 saǵatta máre syzyǵyn kesti. Taǵy bir aýstralııalyq Djon 15 saǵatta jetti, - deıdi Á.Sytdyqova.
Onyń aıtýynsha, bapkeri Sergeı Lenıvkın Máskeýden kelgen. Ol túrkııalyq dosymen birge qoldaýshy retinde qaıyqta bolǵan.
Soltústik buǵazy – sýy salqyn, aǵysy qatty, álemdegi eń qıyn marafondyq qashyqtyqtardyń biri.
Trıatlonnan Qazaqstannyń tuńǵysh temir hanshaıymy, birinshi aıronmen (Ironman) jáne ýltramen (Ultraman) Ánel Sytdyqova 2019 jyly qazaqstandyqtardan alǵash ret áıgili La-Mansh buǵazyn (38 km) gıdrokostıýmsiz júzip ótken. Odan keıin 2022 jyly jazda AQSh-ta Manhetten araly aınalasynda 20 kópirdi aınalyp, 48,5 km qashyqtyqty baǵyndyrdy. Sodan keıin Los-Andjeleste álemdegi eń uzaq marafondyq qashyqtyqtardyń biri – Katalına buǵazyn (34 shaqyrymǵa jýyq) toqtamastan júzip ótti.
Eske sala keteıik, budan buryn Antarktıda sýlaryn alǵash ret júzip ótken qazaq qyzy týraly ne biletinimiz jóninde jazǵan edik.