Qazaq qyzdarynyń qaısarlyǵy men batyldyǵyn kórsete bildik – Quralaı Qabyraıqyzy
ORAL. KAZINFORM – Álemdik deńgeıde el namysyn abyroımen qorǵap júrgen qazaq qyzdary az emes. Halyqaralyq áıelder kúnine oraı Kazinform tilshisi solardyń biri – jaýyngerlik sambodan álem birinshiliginiń qola júldegeri, BQO polıtsııa departamenti jedel qımyldaıtyn arnaıy jasaǵynyń ınspektory, polıtsııa kapıtany Quralaı Qabyraıqyzymen suhbattasqan edi.
- Quralaı Qabyraıqyzy, sportqa qalaı keldińiz, aldymen sol jóninde áńgimelep berseńiz?
- Men Kaztalov aýdany Aqpáter aýylynda týyp óstim, otbasynda bes bala boldyq. Osynaý kıeli jerden Jeńis Stamǵazıev syndy bilikti bapkerlerdiń arqasynda sambodan álem chempıony Nurbol Serikovteı saıypqyran sportshylar túlep ushqanyn kópshilik jaqsy biledi.
Jarysqa baryp kelip júrgen qyzdardy kórip, dzıýdoǵa qyzyǵýshylyǵym oıandy. Ózim de ul balalarmen birge oınap júretinmin. Sodan besinshi synypty bitirerde úıirmege qatysa bastadym. Jetinshi synypta Aqtaý qalasynda dzıýdodan ótken Qazaqstan chempıonatyna qatystym. Oǵan Jeńis aǵanyń shákirti, marqum Alpamys Bısenbaev daıyndap apardy. 48 kelige deıingi salmaqta qola júlde úshin básekede ese jibergenimmen, dýly básekege toly ortanyń qandaı bolatynyn kórdim.
Aqpáterde segizinshi synypty bitirgennen keıin Oral qalasyndaǵy sportqa daryndy balalarǵa arnalǵan mamandandyrylǵan mektep-ınternatyna aýysyp, sambo bapkeri Tımýr Eseevtiń qol astynda jattyqtym. Qazirgi bapkerim – Almıra Isataeva.
Sambodan Qazaqstan Respýblıkasynyń sport sheberimin. Jaýyngerlik sambodan Azııa chempıonatynyń úsh dúrkin qola júldegerimin. Oǵan qosa 2024 jyly Astana qalasynda ótken álem birinshiliginde 54 kelige deıingi salmaqta úzdik úshtikke iliktim. Qoıan-qoltyq urystan, jaýyngerlik qarýmen nysana kózdeýden Qazaqstanda ozyq shyqtym.
Qazirgi tabys-jetistikterim de sportpen turaqty aınalysýymnyń nátıjesi dep esepteımin.
- Sportqa etene jaqyn bolǵannan keıin ishki ister organdaryna ornalasý da qıynǵa túspegen shyǵar?
- Bul jerde árkim óziniń aldyna aıqyn maqsat qoıa bilýi tıis dep oılaımyn. Sol bıik arman jolynan aınymasa, kózdegen mejesine jetedi. Mahambet Ótemisov atyndaǵy Batys Qazaqstan ýnıversıtetiniń dene tárbıesi jáne sport mamandyǵyn 2017 jyly meńgergennen keıin oblystyq mamandandyrylǵan kúzet qyzmeti basqarmasynda úsh jyl jumys istedim. Qazaqstan ınnovatsııalyq jáne telekommýnıkatsııalyq júıeler ýnıversıtetinen qosymsha quqyqtaný mamandyǵyn aldym. Jyldam qımyldaıtyn arnaıy jasaqta buryn qyzdar bolmaǵan eken. 2021 jyly alǵashqylardyń qatarynda synaqtan ótip, arnaıy jasaqqa qabyldandym. Sodan beri osy sapta qyzmet etip kelemin.
- Arnaıy jasaq quramynda Dýbaıda ótken UAE SWAT Challenge halyqaralyq jarysyna eki márte, bıyl jáne ótken jyly qatystyń. Osy álemdik doda týraly ne aıtar ediń?
- Arnaıy jasaqtar olımpıadasy bolyp esepteletin aıtýly jarysta ótken jyly taılandtyq qyzdardy alǵa jibergen edik. Sonda jibergen qatelikterimizden sabaq aldyq, qaı jerde ne isteý kerek ekendigin kerektigin bildik. Bıyl 48 memleketten barlyǵy 109 komanda baq synady. Sonyń ishinde Qazaqstannan bes komanda bardy. Sonyń tórteýi erlerden quralsa, bireýi – «Tomırıs» qyzdar komandasy.
Bul saıystyń ereksheligi, jigitter, qyzdar bolyp bólinbeıdi, barlyq komanda birdeı synnan ótedi. Tórt kún boıy atý daıarlyǵy boıynsha taktıkalyq jattyǵýlardy oryndaımyz. Ár kúnge arnalǵan jattyǵý bar. Sonyń ishinde ofıtserdi qutqarý, pıramıdadan ótý, 80 kılogramdyq manekendi alyp júrý, 120 kılogramdyq dóńgelek kóterý sııaqty asa qıyn synaqtar bar. Besinshi kúni arnaıy kedergiler jolaǵynan ótý de ońaı emes. Saıys bolǵan soń, mundaı sátterde sekýndtardyń bir bóliginiń ózi ról atqaryp ketedi.
Jarys qorytyndysynda Qazaqstannyń tórt erler quramasy birinshi, ekinshi, segizinshi jáne jıyrmasynshy oryn aldy. Biz 18-satyǵa taban tirep, áıelder arasynda chempıon atandyq. Kóptegen erler komandalaryn da artta qaldyrdyq. Osy dodada Qazaqstan komandasynyń myqtylyǵyn búkil álem moıyndady.
- Bul kóp ýaqyt boıy tókken ter men úzdiksiz jattyǵýdyń jemisi ǵoı?
- Árıne, daıyndyqtyń ózine kúsh kerek, jattyǵý kerek. Oǵan qosa tártip bolýy qajet. Otyzdan astam qyzdardyń arasynan iriktelip, «Tomırıs» komandasyna segiz adam ǵana alyndyq. Ekeýi qosalqy quramda boldy. Astana qalasynda «Suńqar» arnaıy jasaq bazasynda tórt aı boıy jattyqtyq. Sodan keıin Dýbaıda taǵy eki aı sheberligimizdi ushtadyq. Aýa raıyna, jergilikti jaǵdaıǵa beıimdeldik.
Eń bastysy, Mánshúk pen Álııa, Hıýazdaı batyr apalarymyzdyń jolyn jalǵap kelemiz dep oılaımyz. Qazaq qyzdarynyń qaısarlyǵy men batyldyǵyn kórsete bildik. Bizdiń álsiz bolýǵa quqyǵymyz joq. Qanmen berilgen qasıetti baıyta bilýge mindettimiz.
- Dýbaıdaǵy jarystan jeńispen oralǵannan keıin Memleket basshysy qabyldap, qurmet kórsetti. Baýyrjan Momyshuly atyndaǵy ekinshi dárejeli «Aıbyn» ordenimen marapattaldyńyz.
- Munyń bári bizge qanat bitirip, kúsh beredi. Jumysta bolsyn, jarysta bolsyn, óz mindet-boryshyńdy oıdaǵydaı atqara bilgenge ne jetsin. Sondyqtan mundaı motıvatsııa burynǵydan da eki-úsh ese artyq jattyǵyp, ózińdi shyńdaı túsýge jeteleıdi. Jalpy, ózim rejımmen júrip-turamyn, erte jatyp, tańmen alty-jetilerde turyp, serýendeımin. Aldaǵy arman-maqsatym da bireý – Qazaq eliniń namysyn abyroımen qorǵap, kók baıraǵymyzdy bıikte jelbirete berý.
Eske sala keteıik, budan buryn Memleket basshysy UAE SWAT Challenge-2026 halyqaralyq jarysynyń jeńimpazdaryn marapattaǵanyn jazǵan bolatynbyz.