Qazaq-qytaı ınvestıtsııalyq qory qurylmaq
ASTANA. KAZINFORM — Memleket basshysy «Qazaqstan-Qytaı» ınvestıtsııalyq forýmynda qazaq-qytaı ınvestıtsııalyq forýmy eki eldiń isker toptary arasyndaǵy tikeleı baılanystardy kúsheıtetin turaqty alańǵa aınalýǵa tıis ekenin aıtty. Bul týraly Aqorda habarlady.
Qasym-Jomart Toqaev mundaı jobalardy júzege asyrý úshin soǵan saı qarjylyq qurylym qajet ekenin eske saldy. Prezıdent forým qatysýshylaryna birneshe jyldan beri tabysty jumys istep kele jatqan «Astana» halyqaralyq qarjy ortalyǵy týraly baıandady.
— AHQO men álemniń jetekshi qarjy ortalyqtarynyń biri sanalatyn Gonkong arasyndaǵy tyǵyz yqpaldastyq mol múmkindikterge jol ashatyny sózsiz. Qyrkúıek aıynyń basynda «Samuryq-Qazyna» qory Ortalyq Azııa jáne ShYU elderi emıtentteriniń arasynda birinshi bolyp Qytaıdyń bankaralyq naryǵyna kirdi. Jalpy somasy úsh mıllıard ıýannan (450 mıllıon dollar) asatyn panda-oblıgatsııalar shyǵardy. Jalpy, Qazaqstan ınvestıtsııalyq kezeńdi barynsha qysqa, ashyq ári tehnologııalyq turǵydan ozyq etip uıymdastyrýǵa nıetti. Kazakh Invest ulttyq kompanııasy janynan qazaq-qytaı ınvestıtsııalyq qoryn qurý týraly kelisimge qol qoıý — osy baǵyttaǵy mańyzdy qadamnyń biri, — dedi Memleket basshysy.
Qasym-Jomart Toqaevtyń pikirinshe, Qazaq-qytaı ınvestıtsııalyq forýmy eki eldiń isker toptary arasyndaǵy tikeleı baılanystardy kúsheıtetin turaqty alańǵa aınalýǵa tıis.
— Sondyqtan osy forýmdy «Qazaqstan-Qytaı» Almaty ınvestıtsııalyq dıalogy degen ataýmen jyl saıyn qyrkúıek aıynda ótkizýdi usynamyn. Jalpy, búgin birqatar naqty kelisimderge qol jetkizdik. Bul kelisimder Qazaqstan men Qytaıdyń jáne tutas Eýrazııa qurlyǵynyń ornyqty damýyna tyń serpin beredi dep senemin, — dedi Prezıdent.
Osy forýmda Qasym-Jomart Toqaev Qazaqstan Qytaımen máńgi dostyq baılanystaryn nyǵaıtýǵa basa mán berip otyrǵanyna nazar aýdardy.
— Elimiz úshin bul — syrtqy saıasattaǵy eń mańyzdy maqsattardyń biri. Ortaq tarıhymyzǵa úńilsek, Qytaı halqy bizdiń halqymyzǵa eshqashan eshqandaı zııan keltirgen joq. Qos halyq ózara syılastyq pen qoldaý aıasynda kóp jyl boıy birge ómir súrgen. Al qazirgi turaqsyz, buldyr zamanda Qazaqstan men Qytaı senimdi seriktester retinde qoıan-qoltyq birge áreket etip, san alýan syn-qaterlerge toıtarys berýi kerek. Qytaı tilinde mynadaı maǵynaly maqal bar: 人心齐，泰山移, ıaǵnı: «Biz bárimiz birtutas bolsaq, bıik Taıshan taýyn da ornynan qozǵaı alamyz». Qazaqstan men Qytaı — eki dos, kórshiles el bolyp, árbir isti oıdaǵydaı júzege asyrady dep senemin, — dep túıindedi Memleket basshysy.
Aıta keteıik, Prezıdent Qazaqstan Qytaı men Eýropany jalǵaıtyn basty logıstıkalyq habqa aınalatynyn aıtty.
