Qazaq-Qytaı dostyǵy máńgi jalǵasa beredi - Maıra Muhamedqyzy
BEIJІŃ. KAZINFORM – Qazaqstan - Qytaımen ejelden beri kórshi kele jatqan dostyǵy myǵym, berekesi bekem el. Eki eldiń dostyǵy budan ary da jalǵasa beredi.
Bul týraly Kazinform tilshisine Qytaıdaǵy Qazaqstan týrızmi jylynyń resmı ashylý saltanatyna óner kórsetýge kelgen QR eńbek sińirgen ártisi Maıra Muhamedqyzy aıtty.
«Mine, búgin alyp shaharymyz Almatydan Qytaı astanasy Beıjińge keldik. Maqsatymyz – Qytaıdaǵy Qazaqstannyń týrızm jylynyń resmı ashylý saltanatynda óner kórsetý. Menimen birge ózderińiz kórgendeı, Qazaqstannyń halyq ártisi Roza Rymbaeva, opera ánshisi Zarına Altynbaeva, «Ulytaý» etno-rok toby, Abaı atyndaǵy QazUOBT hor ujymy, «Serper» jáne «Sazgen sazy» ansamblderiniń shyǵarmashylyq ujymdary, «Astana Balet» balet trýppasy sonymen birge basqa da ánshiler, kúıshiler Beıjińdegi China National Opera House sahnasynda óner kórsetemiz», - dedi ánshi.
Sondaı-aq, Maıra Muhamedqyzy bul ıgi is-shara eki eldiń basshylarynyń senimdi dostyǵynyń sımvoly ekenin de atap ótti.
«Qazaqstan - Qytaımen ejelden beri kórshi kele jatqan dostyǵy myǵym, berekesi bekem el. Eki eldiń dostyǵy budan ary da jalǵasa beredi. Mine, bul shara - eki el basshylarynyń senimdi dostyǵynyń sımvoly. Tatý kórshi el ekenimizdiń aıǵaǵy. Qazaqstannyń Qytaıdaǵy týrızm jyly bolyp jarııalanýy osyǵan dálel bolyp tur. Osyndaı aýqymdy is-sharalar arqyly biz Qytaı eline ózimizdiń mádenıetimizdi, salt-dástúrimizdi kórsetemiz. Bizdiń de baǵa jetpes qundylyqtarymyzdy, baı mádenıetimizdi ózge elder kórsin, bilsin», - dedi Maıra Muhamedqyzy.
Aıta keteıik, aldaǵy 28-29 naýryz kúnderi Beıjińde Qytaıdaǵy Qazaqstan týrızmi jylynyń resmı ashylý saltanaty ótedi. Osyǵan oraı Qazaqstannan Beıjińge 600-ge jýyq arnaıy delegatsııa ushyp keldi.
