Qazaq-qyrǵyz shekarasynda taǵy bir kólik ótkizý beketi salynady
ASTANA. KAZINFORM – Qyrǵyz Respýblıkasy men Qazaqstan shekarasynda toǵyzynshy arnaıy ótkizý beketi salynady. Kólik mınıstri Marat Qarabaev eki el Úkimet basshylarynyń elordadaǵy kezdesýinen keıin osynda málimet berdi.

- Byltyr eki aradaǵy júk tasymalynyń kólemi 2,4 mln tonnaǵa jeti. Bul 2023 jylmen salystyrǵanda 19 paıyz artyq. Osy salany ári qaraı damytý úshin arnaıy ruqsat berý qujattaryn shilde aıyna deıin elektrondy formatqa ótkizemiz dep kelisip otyrmyz. Bul avtomobıl joly arqyly júk tasymalyn arttyrady, - dedi ol.
Sondaı-aq, ol eki el shekarasyndaǵy ótkizý beketterin jańǵyrtý, kúrdeli jóndeý máseleleri kún tártibinde turǵanyn aıtty.
- Qazaqstan tarabynan bıyl Besaǵash arnaıy ótkizý beketin tolyq modernızatsııadan ótkizemiz. Aldaǵy sáýir aıynda jumys bastalady. Oǵan qosa Sortóbe ótkizý beketinde aýyr júk tasymaldaıtyn kólikterdi ótkizetin oryn joq. Sol jerde ortasha jóndeý ótkizip, mamyr aıynan bastap ol jaqta da aýyr júk tasymaldaıtyn kólikterdi ótkize bastaımyz. Sondaı-aq, jańa toǵyzynshy ótkizý beketin ashý máselesin talqylap jatyrmyz. Onyń aıasynda Aqsý-Kamyshanovka baǵytynda jolaýshylar men júk tasymalyn ótkizetin jańa beket iske qosylady. Ol úshin óz tarabymyzdan, bıyl tıisti qujattardy ázirlep, kelesi joly qurylysty bastaımyz dep josparlap otyrmyz, - dedi Marat Qarabaev.
Eske salsaq, Kólik mınıstri Marat Qarabaev Úkimet otyrysynan keıin ótken baspasóz máslıhatynda Almatynyń aınalma jolymen júrý aqysy nege qymbattaǵanyn túsindirgen edi.