Qazaq-qyrǵyz shekarasynda burysh dep ákele jatqan taýar 195 myń qorap temeki bolyp shyqty
ASTANA. KAZINFORM — Qazaqstan men Qyrǵyzstan shekarasynda temekiniń iri partııasy ustaldy.
Qazaq-qyrǵyz shekarasynda «Qarasý» jáne «Aısha bıbi» ótkizý pýnktterinde temekini zańsyz ákelý áreketteri qıylysqan.
Zańsyz partııany 26 qyrkúıekte memlekettik kirister organdary men shekarashylar ustady.
«Qarasý» ótkizý pýnktinde temeki taýarǵa ilespe qujattar boıynsha bolgar buryshyn tasymaldaǵan refrıjeratordan tabyldy.
Tekserý barysynda «Oris», «Parlament», «Zumerret» markaly jarııalanbaǵan 180 myńnan astam qorap temeki tabyldy.
«Aısha bıbi» ótkizý pýnktinde taýarǵa ilespe qujattar boıynsha burshaqty tasymaldaǵan júk avtokóliginde tekserý barysynda jarııalanbaǵan 15 myń qorap «Oris» temekisi anyqtaldy.
Barlyq temeki ónimderinde aktsızdeletin ónim úshin kózdelgen sáıkestendirý quraldary joq.
Іs júrgizý sheshimin qabyldaý úshin barlyq materıaldar Jambyl oblysy boıynsha ekonomıkalyq tergeý departamentine tapsyrylady.
