Qazaq kınosynyń belesi: 11 otandyq fılm halyqaralyq festıvalderde júlde aldy

Belgili bolyp otyrǵandaı, osy jyldyń aqpan aıynda sheteldegi qandastardyń ómirin kórsetken «Oralman» fılmi Nepaldaǵy 22-shi Halyqaralyq kınofestıvalde «Úzdik halyqaralyq kórkem fılm» júldesiniń ıegeri boldy. Sondaı-aq bul týyndy qyrǵyzstandyq «Aq ilbis» báıgesiniń eki baǵyty boıynsha júldeger atandy. Atap aıtqanda, fılmdegi basty róldi somdaǵan Dýlyǵa Aqmolda «Úzdik akter» dep tanyldy. Sondaı-aq kınotýyndy «Ortalyq Azııadaǵy úzdik fılm» ataǵyn ıelendi.

Osydan keıin naýryz aıynda Aqan Sataev túsirgen «Anaǵa aparar jol» fılmi Nıý-Iork qalasynda ótken «WeLink» Halyqaralyq kınofestıvalinde «Úzdik kórkem fılm» atalymynda jeńimpaz boldy. Atalǵan fılm analyq mahabbatty, erlikti, azamattyqty, otansúıgishtikti, rýhtyń joǵarylyǵyn nasıhattaıdy.

Sol sekildi sáýir aıynda Venera Qaıyrjanovanyń «Tyǵylmaq» fılmi V Halyqaralyq konkýrs-festıvalinde dybystyq áleýetiniń joǵary bolǵany úshin Grıgorıı ıAkovlevıch Frank atyndaǵy arnaıy júldemen marapattaldy.

Aıta ketý kerek, atalǵan fılmniń dybysyn «Intonatsıı» stýdııasynyń stýdent-rejısserleri ázirlegen. Kınoda eresekter shabýylynyń qurbany bolǵan qos qurbynyń tarıhy baıandalady.

Adamdardyń birin-biri baǵalaýynan, birin-biri syılaýynan, qurmet pen izgilik syndy qasıetterdi boıǵa jınaýdan asqan mańyzdy eshteńe joq ekenin kórsetýge tyrysqan Serik Ábishev pen Rýslan Magomadovtyń «Bir kúni balalar úıinde» atty kınokartınasy Reseıde ótken «Svet mırý» Halyqaralyq kınofestıvalinde bas júlde ıelendi.

Sondaı-aq belgili rejısser Talǵat Temenov túsirgen «Qalamyzdyń kishkentaı hanzadasy» atty fılmde basty rólderdiń birin somdaǵan Tóleýbek Aralbaev «Úzdik er adam róli» úshin marapattaldy. Bul júlde ártiske Tsındao qalasynda ótken ShYU elderiniń Halyqaralyq kınofestıvalinde tabystaldy. Fılmde taǵdyrlary uqsas qos adam kórsetilgen. Birinshisi, balalar úıinde tárbıelenip jatqan alty jasar bala bolsa, ekinshisi - ómirlik tájirıbesi mol Qarttar úıinde ómir súrip jatqan aqsaqal. Sıýjet boıynsha eki akter bir-birimen kezdeısoq jolyǵyp qalady. Kınonyń jelisi ári qaraı ekeýiniń suhbaty retinde, óz ómirlerin eske alyp syrlasqan áńgimeleri boıynsha jalǵasady.

10 naýryz kúni Stokgolm qalasynda Shvetsııadaǵy qazaqstandyq jastar qaýymdastyǵy men Sháken Aımanov atyndaǵy «Qazaqfılm» AQ-nyń birlesýi arqyly jáne Shvetsııadaǵy Qazaqstan elshiliginiń uıymdastyrýymen qazaqstandyq fılmderdiń kórsetilimi boldy. Eýropalyq kórermender nazaryna otandyq kınematografııa ónimderinen «Shal», «Jaýjúrek myń bala» sekildi fılmder usynylǵan edi.

Al 2-5 mamyr aralyǵynda Oman Sultandyǵynyń Maskat qalasyndaǵy «VOX Shatti Cinema» kınoteatrynda qazaqstandyq kınotýyndylardyń aptalyǵy ótti. Kólemdi shara Aqan Sataev túsirgen «Anaǵa aparar jol» atty kórkem fılmniń kórsetilimimen bastaldy. Al aptalyqtyń sońǵy kúninde kóremender nazaryna Rústem Ábdirashevtiń «Almas qylysh» týyndysy usynyldy.

Sonymen qatar, ústimizdegi jyldyń mamyr aıynda Italııa jáne Estonııa memleketterinde Qazaqstandyq kıno kúni atalyp ótti. Aıta ketý kerek, dál osyndaı sharalardy jyl sońyna deıin Taıland Koroldiginde, Chehııada, Slovakııada, Rýmynııada jáne basqa da elderde ótkizý josparlanýda.

Eske salsaq, 5 sáýir kúni Ámire Qashaýbaevtyń 1925 jyly Parıj qalasynda jetken tuǵyrly jeńisi týraly sýretteıtin, gollıvýdtyq kompanııamen birigip túsirilgen «Ámire» fılminiń tusaýkeseri sátti ótti. Atalǵan fılm óte joǵary kásibı deńgeıde túsirilip, tájirıbeli mamandar qolymen óńdelgen. Bul kınotýyndy da kórermenderdiń erekshe yqylasyna bólendi dep ábden aıtýǵa bolady.

Aldaǵy ýaqytta álemdik satylymǵa, kórermender nazaryna qazaqstandyq-qytaılyq ujymdardyń birlese jasaǵan jumysy «Kompozıtor» kartınasy jaryqqa shyqpaq. Atalǵan týyndyda Ekinshi dúnıejúzilik soǵys jyldary bizdiń elde ómir súrgen ataqty qytaılyq kompozıtor Sı Sınhaı jáne onyń Baqytjan Baıqadamovpen dostyǵy týraly sýretteledi.

Osy jyldyń sońyna deıin «Balýan Sholaq» fılmi jáne «Kúltegin», «Muzbalaq» anımatsııalyq týyndylary kórermen nazaryna usynylmaq.