«Qazaq kınosynyń aptalyǵy» aıasynda elordalyqtar Sh.Aımanov atyndaǵy «Qazaqfılm» AQ-nyń osy jyly túsirgen kórkem jáne derekti fılmderin tamashalaıdy
ASTANA. 9 jeltoqsan. QazAqparat - 10-15 jeltoqsan aralyǵynda Astanada «Qazaq kınosynyń aptalyǵy» ótedi.
Astanalyqtar men elorda qonaqtary Sháken Aımanov atyndaǵy «Qazaqfılm» AQ-yń osy jyly túsirgen kórkem jáne derekti fılmderdi tamashalaıtyn bolady.
«Qazaq kınosynyń aptalyǵy» sheńberinde Sháken Aımanov atyndaǵy «Qazaqfılm» AQ shyǵarǵan «Armandastar» (rejısseri Erlan Saǵynov), «Ańshy bala» (rejısserler Erlan Nurmuhambetov jáne Begarys Elýbaı), «Shal» (rejısseri Ermek Tursynov), «Lotereıa» (rejısseri Dámir Manabaı), «Jaýjúrek Myń Bala» (rejısseri Aqan Sataev) kórkem fılmderi kórsetiledi.
Sonymen qatar, jas rejısser Ahat Ybyraevtyń otandyq kıno tarıhynda tuńǵysh fentezı janrynda túsirilgen «Ańyzdar kitaby. Ǵajaıyp orman» fılminiń tusaýkeseri jáne «Er Tóstik pen Aıdahar» atty qazaqtyń tuńǵysh tolyqmetrajdy anımatsııalyq fılminiń kórsetilimi ótedi.
«Qazaq kınosynyń aptalyǵy» aıasynda Turar Rysqulov, Májit Begalın, Ábish Kekilbaev, Asanáli Áshimov syndy basqa da kórnekti qoǵam qaıratkerleriniń ómiri men shyǵarmashylyǵyna arnalǵan Sháken Aımanov atyndaǵy «Qazaqfılm» AQ shyǵarǵan derekti fılmderdi de kórsetý josparlanyp otyr.
Kıno aptalyǵynyń ashylý saltanaty 10 jeltoqsanda 16.00-de Oqýshylar saraıynda bolady. Kórsetilimder «Kerýen» saýda ortalyǵyndaǵy «Kınopark-7» kınoteatrynda ótedi. Kirý tegin. «Qazaq kınosynyń aptalyǵy» sheńberinde kórermen nazaryna usynylatyn barlyq fılmderdiń kórsetilimine kartınanyń rejısserlary men shyǵarmashylyq toptyń ókilderi qatysady.
