Qazaq kınosy qazir jańarý ústinde - Dıdar Amantaı
ALMATY. Naýryzdyń 25-si. QazAqparat /Názıra Eleýhan/- Búgin Almatyda «Qazaq kıno panoramasy 2008-2010» atty shyǵarmashylyq konferentsııa nátıjelik «dóńgelek ústel» otyrysymen aıaqtaldy,
dep habarlaıdy QazAqparat.
Dóńgelek ústelge Qazaqstan Kınematografıster odaǵynyń músheleri, kınosynshylar, rejısserler, óner tanýshylar men kınotanýshylar, sondaı-aq jalpy kıno ónerin súıetin qaýym qatysty. Olardyń pikiri ár túrli bolǵanymen, jalpy alǵanda qazaq kınosynyń baǵytyna oń baǵa berdi. Kınotanýshylar sońǵy kezderi anımatsııalyq fılmderdiń jandanyp kele jatqanyna rızashylyqtaryn bildirip, derekti fılmderdi de kóbirek túsirý kerek ekendigin aıtty. Sonymen qatar, qatysýshylar sońǵy kezderi kóp kóńil bólinip ketken, kommertsııalyq-janrlyq fılmderdi ǵana túsirip qoımaı, avtorlyq jáne halyqtyq kınolardy da birdeı ustap, umytpaý kerektigin jetkizdi.
«Qazaq kınosy qazir jańarý ústinde, aıaq-alysy jaman emes. 2008 jyldan bastap, jańa ózgerister bolyp jatyr. Tehnıkalyq modernızatsııa júrgizildi. «Qazaqfılmniń» búgingi kúni ustanyp otyrǵan baǵyty prodıýsserlik kıno. Prodıýsserlik kıno degenmiz - kez kelgen jobany jan-jaqty talqylap, erteńgi onyń qaıtarymyn da eseptep, kórermenniń jas mólsherin anyqtap, odan keıin baryp kıno óndirisine kirisedi. Biz bir jaǵynan prodıýsserlik kınony damyta otyryp, onyń komertsııalyq qarym-qabiletin kóbeıte otyryp, ekinshi jaǵynan búgingi art-haýstyq fılmderdiń dástúrli, bizdiń "Qazaqfılmge" tán belgilerin de joǵaltyp almaýǵa talpynyp otyrmyz", dedi jıyn barysynda Sh. Aımanov atyndaǵy «Qazaqfılm» ulttyq kınostýdııasynyń bas redaktory Dıdar Amantaı. Onyń aıtýynsha, 2008-2009 jylǵy zertteýler boıynsha Qazaqstandaǵy kınoteatrlarǵa baratyn kórermenderdiń jas mólsheri 14-pen 25-tiń aralyǵyndaǵy jastar. «Sondyqtan, bizdegi túsiriletin negizgi fılmderdiń taqyryptarynyń barlyǵy da sol aralyqtaǵy jastarǵa arnalady. Sodan keıin baryp dıskter satylyp, teledıdarda kórsetiledi. Teledıdar eń sońǵy aıaldamasy desek te bolady», dedi Dıdar Amantaı.
