Qazaq kınosy qazir damýdyń jańa tolqynynyń aldynda tur - rejısser Bolat Qalymbetov
ALMATY. 20 jeltoqsan. QazAqparat /Erlik Erjanuly/ - Belgili kınorejısser jáne akter, QR Eńbek sińirgen ártisi Bolat Qalymbetovtyń pikirinshe, qazaq kınosy 1990-jyldardyń bas kezinde qalyptasqan tyǵyryqtan shyqty. Qazir ol damýdyń jańa tolqynynyń aldynda tur.
"Qazaq kınosynyń qarqyndy túrde qaıta damýyna jastar da, orta jáne aǵa býyn da shama-sharqynsha jumys jasap jatyr. Bul nátıjesiz emes. Elbasynyń Astanada Sháken Aımanov atyndaǵy "Qazaqfılm" AQ men "Tanaris" kınokompanııasy birigip túsirgen "Keshikken mahabbat" fılminiń tusaýkeserine qatysýy sonyń naqty bir aıǵaǵy bola alady. Bul lırıkalyq komedııa 2011 jyly Qazaqstan, Reseı jáne Frantsııa kınoteatrlarynda kórermen nazaryna usynylatyn bolady", - deıdi Bolat Qalymbetov. Kıno ónerindegi alǵashqy qadamyn Abdolla Qarsaqbaevtyń «Balalyq shaqqa saıahat» fılminen bastaǵan óner sheberiniń "Sardaryn" buǵan deıin amerıkandyqtar satyp alǵan bolatyn.
"2010 jyl men úshin asa tabysty boldy. Tsetkom janrynda alǵash ret Serik Ótepbergenovpen birge 42 serııaly "Aınalaıyn" degen fılm túsirip jatyrmyn. "Qazaqstan" telearnasynda kórsetilip jatqan ana tilimiz jaıly bul kıno reıtıng boıynsha 1-orynda kele jatyr. Onda qaladan aýyldaǵy atasyna kelgen Álisher degen balanyń qazaq tilin úırenýi fılmge arqaý bolady. Bizge qazir menińshe, elimizdiń erteńgi kúni men qýanyshyn aıtatyn, muńyn-sherin tarqatatyn úlken-úlken fılmder kerek",- deıdi bıylǵy jyly "Seker" men "Keshikken mahabbat" fılmderinde basty rolderdi somdaǵan akter B. Qalymbetov.
Temirbek Júrgenov atyndaǵy óner akademııasynda rejıssýradan dáris beretin tálimgerdiń bıylǵy jyly bitirgen 8 shákirtiniń jeteýi "Qazaqfılmnen" qysqa metrajdyq fılmderge tapsyrys alǵan. Aldaǵy jyly endi ózi de 3 jyl boıy daıyndalǵan jeke fılmin túsirýdi bastamaq.
"Buǵan deıingi barlyq shyǵarmalarym sııaqty bul týyndym da qazaqtyń taǵdyryna arnalady. Aýylda ósken bala bolǵan soń maǵan elimniń taýy men dalasy, sýy men aýasy erekshe ystyq. Sondyqtan ony bıznes úshin emes, eń aldymen halqymnyń aldyndaǵy azamattyq paryzymdy óteý úshin jasaımyn. Ónerdi ósiretin eń aldymen - talǵam. Kınoda qazir demokratııa paıda boldy. Ne túsirem deseń de óz erkiń ózińde. Biraq eldiń muńyn, qýanyshyn aıtatyn úlken fılmder áli azdaý bolyp tur ", - deıdi QR Eńbek sińirgen ártisi B. Qalymbetov.
