Qazaq kınosy arqyly ult muraty men eldik ıdeıany nasıhattaý týraly Elbasy tapsyrmasy soraqylyq kórinistermen júzege aspaq pa?
ASTANA. Jeltoqsannyń 9-y. QazAqparat /Qanat Mámetqazyuly/ - Kıno arqyly ult muraty men eldik ıdeıany nasıhattaý týraly Elbasy tapsyrmasy soraqylyq kórinistermen júzege aspaq pa? Búgin QR Parlamenti Májilisiniń jalpy otyrysynda bir top depýtat QR Mádenıet jáne aqparat mınıstriniń atynda saýal joldap, onda qazaq kınosynyń búgingi betalysyna alańdaýshylyqtaryn bildirdi. Saýaldy Áleýmettik-mádenı damý komıtetiniń múshesi depýtat Nurlan Ónerbaı oqyp berdi,
dep habarlaıdy QazAqparat.
«Májilistiń Áleýmettik-mádenı damý komıtetiniń atyna otandyq fılmderge qatysty «Azamat» jastar klýbynan kelip túsken hat talqyǵa salyndy. Qarashanyń 23-inde Sh. Aımanov atyndaǵy «Qazaqfılm» ulttyq kınostýdııasyna barǵan Elbasy N. Nazarbaev «qazaq kınosy otansúıgishtikti dáriptep, elimshil, jershil urpaqty tárbıeleýge atsalysýy kerektigin, ıaǵnı ulttyq kınodan ulttyq ıdeıa men ult muraty sezilip turýy tıistigin» aıtqan bolatyn. Keıingi ýaqytta baspasóz betindegi qazaq kınosynyń kórkemdik sapasy, rýhanı deńgeıine degen narazylyq buqara tarapynan kúsh alyp keledi. Óıtkeni búgingi qazaq kınosynda halqymyzdyń ulttyq namysyn qorlaǵan, tarıhymyzdy burmalap, azǵyndyqty, uıatsyzdyqty tý etken fılmder jaýynnan sońǵy sańyraýqulaqtaı qaptap barady. Basy «Borattan» bastalǵan bul masqara úrdis tolastar emes. Qazaqqa zaty túgili aty jat arsyzdyqtardy nasıhattaıtyn fılmderdiń jarnamasy teledıdardan ashyq berilip, urpaq sanasyn ýlaýda. «Oskar» syılyǵyna usynylyp jatqan «Kelin» fılminde kózine túsken erkekpen qatynasqa túse beretin zınaqor áıeldiń áreketi beınelengen. Malmen jynystyq qatynasqa túsý sekildi el namysyn qorlaǵan uıatsyz kórinisterge toly fılmniń madaqshylaryn basqa tildegi basylymdar jarysa jarııalap jatyr. «Tıýlfan» fılminde qoǵam shyndyǵy degen jeleýmen dáret syndyrǵan soraqy kórinister eldi mazaq etse, «Qaraoı» fılminde týǵaly jatqan ekiqabat áıeldi zorlaǵan kórinis, «Áke qorlyǵy» deıtin fılmde týǵan qyzyn zorlaǵan áke sıýjetterge ózek bolypty. Sonda kıno arqyly ult muraty, eldik ıdeıany nasıhattaý degen Elbasy tapsyrmasy osyndaı soraqylyqtarmen iske aspaq pa?», dedi saýaldy jarııalaǵan depýtat Nurlan Ónerbaı.
Sonymen birge, depýtat reseılik fılmderdi mysalǵa ala otyryp, onyń patrıottyq sezimge toly bolatynyn, ulttyń mereıin ósirý sekildi eldik máseleler qamtylatyndyǵyn aıtty. «Al bizdiń kınoger sabazdarymyz «Qaırat devstvennık» deıtin fılm túsirip, «ıa malchıka hochý» dep basyn ustaǵan pedofıldikti, qyztekelik pen nápsi qumarlyqty qozǵaǵan arsyzdyqty jalaýlatqany janymyzdy túrshiktiredi», dedi ol.
Osyǵan oraı, depýtattar bundaı bassyzdyqqa toqtaý salý kerektigin, ultjandy jastar tobynyń oryndy másele kótergenin jetkizedi.
Depýtattyq saýalǵa Májilistiń Áleýmettik-mádenı damý komıtetiniń barlyq depýtattary jáne basqa komıtettiń birqatar depýtattary qol qoıǵan.
