Qazaq kınosyna jańa esimder men tyń ıdeıalar qajet – mınıstr
ASTANA. KAZINFORM – Qazaq kınosy kúnine oraı Mádenıet jáne aqparat mınıstri Arman Qyryqbaev otandyq kıno salasynyń damýy, «Qazaqfılmniń» bolashaǵy jáne ulttyq fılmderdi qoldaý sharalary týraly aıtty.
Mınıstrdiń sózinshe, kıno – ulttyq mádenıetti dáriptep, eldiń tarıhy men dástúrin keıingi urpaqqa jetkizetin mańyzdy sala. Sońǵy jyldary Qazaqstanda kınoındýstrııany qoldaý tetikterin jetildirý jáne ulttyq kınostýdııanyń áleýetin arttyrý baǵytynda jumystar júrgizilip jatyr.
– Sháken Aımanov atyndaǵy «Qazaqfılm» ulttyq kınostýdııasynyń orny bólek. Memleket basshysynyń tapsyrmasymen kınostýdııany tikeleı memlekettik qoldaý qaıta qolǵa alyndy. Endigi mańyzdy qadam – «Qazaqfılm» men Ulttyq kınony qoldaý memlekettik ortalyǵyn biriktirý, – dedi Arman Qyryqbaev.
Onyń aıtýynsha, mınıstrliktiń negizgi mindetteriniń biri – kıno salasyndaǵy ózgeristerdiń tıimdiligin qamtamasyz etý, óndiristik jáne shyǵarmashylyq múmkindikterdi kúsheıtý, sondaı-aq jeke kınokompanııalardy qoldaý.
Qazaqstanda jyl saıyn ondaǵan otandyq fılm túsiriledi. Máselen, 2024 jyly 94 fılm óndirilse, 2025 jyly otandyq prokatqa 103 fılm shyqqan.
Mınıstr qazaq kınosyna kórermen qyzyǵýshylyǵynyń artyp kele jatqanyn atap ótti. Sonymen qatar ulttyq kıno murasyn saqtaý úshin altyn qordaǵy fılmderdi tsıfrlandyrý jáne qalpyna keltirý jumystary jalǵasyp jatyr.
Bıyl rejısser Abdolla Qarsaqbaevtyń týǵanyna 100 jyl tolady. Onyń mereıtoıy ıÝNESKO-nyń ataýly kúnder men mereıtoılar kúntizbesine engizilgen.
Arman Qyryqbaev qazaq kınosyna jańa esimder, tyń ıdeıalar jáne eldiń ótkeni men búgini, bolashaǵy men jetistikterin arqaý etetin mazmundy týyndylar qajet ekenin aıtty.
– Mundaı fılmder kórermen júreginen oryn alyp, Qazaqstandy álemge laıyqty tanytýy tıis, – dedi mınıstr.
Buǵan deıin áıel quqyǵyn qorǵaıtyn fılm jaryqqa shyqqanyn jazǵanbyz.
