Qazaq kınosy Parıj tórinde: Frantsııada Qazaqstan kınosy kúnderi bastaldy
ASTANA. KAZINFORM — Frantsııadaǵy Qazaqstan mádenıeti kúnderi aıasynda Parıjde Qazaqstan kınosy kúnderi bastaldy. 17-19 qyrkúıek aralyǵynda frantsýz kórermenine otandyq kınonyń klassıkalyq týyndylary men zamanaýı fılmder usynylady.
Mádenıet jáne aqparat mınıstrligi baspasóz qyzmetiniń málimetinshe, kıno kúnderi kórnekti rejısser Abdolla Qarsaqbaevtyń «Alty jasar Alpamys» fılmimen bastaldy. Rejısserdiń týǵanyna 100 jyl tolýyna oraı týyndynyń 4K formatynda restavratsııadan ótken nusqasy kórsetildi.
Zamanaýı qazaqstandyq kıno «Qaitadan» jáne «Igromanka» fılmderimen tanystyrylady. Eki týyndy da memlekettik qoldaýmen túsirilgen.
Frantsýz kórermeni Qazaqstan kınosy kúnderi aıasynda otandyq kınematografııanyń ár jyldary túsirilgen týyndylaryn tamashalaıdy.
Baǵdarlamada qazaq kınosynyń klassıkalyq týyndylarymen qatar, jańa býyn avtorlarynyń keıingi jyldardaǵy jumystary da qamtylǵan.
Sondaı-aq baǵdarlama aıasynda qazaqstandyq kınematografıster frantsýz kórermenimen shyǵarmashylyq kezdesýler ótkizip, eki eldiń kıno salasyndaǵy kásibı baılanystary men mádenı dıalogty damytý jaıyn talqylaıdy.
Budan buryn Qazaqstanda jyl basynan beri memlekettik qoldaýdyń arqasynda bes kórkem fılmniń óndirisi aıaqtalǵanyn jazǵanbyz. Jyl sońyna deıin taǵy 17 kınojobany aıaqtaý josparlanyp otyr.
