Qazaq kınolaryn ınternetten kórý múmkindigi týdy
ASTANA. 14 aqpan. QazAqparat - Ǵalamtor atty sheksiz álemnen úzdik kınotýyndylardy taýyp, «onlaın» rejıminde kóretinimiz bar.
Biraq keıde qazaq kınofılmderin taba almaı dal bolamyz. Jańa kınolentalar bylaı tursyn, altyn qorda saqtalǵan kesek dúnıelerdi tabý da qıynǵa soǵady. Qazaq kınosynyń shynaıy jankúıerleri úshin jaǵymdy jańalyq - «Kıvı» beıneportaly qazaq fılmderin biriktirip, arnaıy ınternet-kınozalyn ashyp otyr, dep jazady «Aıqyn» gazetiniń tilshisi Áıgerim Dosym.
Kınozalda kórkem, tarıhı hám derekti kınofılmder toptastyrylǵan. Tipti, anımatsııalyq kınotýyndylarmen qatar, qazaq kınosynyń klassıkalyq úlgileri men sońǵy kınolentalardy da tabýǵa bolady. Kiwi.kz/kazakhfilm dep atalatyn portaldan 23 otandyq ónimdi tabýǵa bolady.
Kınotýyndylardy ońaı izdep, erkin kóre alasyz. Qýantarlyǵy, árbir kınoseans úshin aqy tólenbeıdi. Bolashaqta muraǵat qory tolyqtyrylady. Taǵy bir qýantarlyq jaıt, otandyq kınotýyndylardy tek qazaqstandyq kınomandar ǵana emes, shetelde turatyn qandastarymyz da tamashalaı alady. Atalmysh joba Mádenıet jáne aqparat mınıstrligi men qazaqstandyq ınternetti hám resýrstardy damytý assotsıatsııasynyń muryndyq bolýymen júzege asyrylyp otyr. Al «Kıvı» resýrsy - jobanyń negizgi áriptesi.
