Qazaq kıno óneriniń maıtalmany Asanáli Áshimov QazUÝ-de boldy
ALMATY. 9 jeltoqsan. QazAqparat /Ádilet Musahaev/ - "Júregi «qazaq halqy» dep soqqan asyl tulǵa Serik Ábdiraıymuly aldyndaǵy bir paryzym, onyń atyna ashylǵan oqý zalynda bolyp,
stýdenttermen beıresmı áńgimelesý bolǵan edi". Bul jaıynda búgin qazaq kınosynyń nar tulǵasy, KSRO halyq ártisi Asanáli Áshimov QazUÝ-diń jýrnalıstıka fakýltetiniń oqytýshy jáne stýdentter qaýymymen kezdesý barysynda aıtty.
Onyń QazUÝ-ke kelýdegi negizgi maqsaty - óziniń rýhanı dosy, talaı jyl osy fakýltette ustazdyq etken sanatker jazýshy Serik Ábiraıymulynyń atyna ashylǵan Oqý zalymen tanysý boldy.
Aıta keteıik, aǵymdaǵy jyldyń 25 qyrkúıeginde ál-Farabı atyndaǵy QazUÝ-diń jýrnalıstıka fakýltetinde mádenıet qaıratkeri, daryndy jazýshy-jýrnalıst, aýdarmashy Serik Ábdiraıymuly atyndaǵy oqý zaly saltanatty túrde ashylǵan bolatyn.
Onyń tusaýkeserine QR qoǵam qaıratkerleri, ǵalymdar men jazýshylar kelgen bolatyn. Asanáli Áshimov osy saltanatty bas qosýǵa issaparda bolýyna baılanysty kele almaı qalǵandyǵyn aıtady.
Óner maıtalmany jazýshy, jýrnalıst, ustaz, aýdarmashy bolǵan azamat týraly aıta kele, búgingi tańda qazaq qoǵamyn alańdatyp otyrǵan máseleler jóninde oı qozǵady. Sonymen qatar ol bolashaq jýrnalıster men baspager-redaktorlarǵa jazýǵa mashyqtanýda qandaı kúrdelilikterdi este ustaý qajettigin aıtyp, olardy ult parasaty bolýǵa shaqyrdy.
A.Áshimov sóz sońynda ýnıversıtet basshylyǵynyń ult úshin qyzmet etken tulǵalardy ulyqtaýdaǵy jasap otyrǵan sharalaryna rızashylyǵyn bildirip, jaqyn kúnderi qasıetti qara shańyraqqa taǵy kelip, óz áriptesterimen birge stýdent jastarmen kezdesý ótkizýge ýáde berdi.
