Qazaq kınemotografııasynda jańa býyn ósip keledi - E. Amanshaev
ALMATY. 5 jeltoqsan. QazAqparat - Qazaq kınosynyń keleshek damý zańdylyǵy men erejesin anyqtaıtyn qazirgi jańa býyn bolmaq. Bul týraly Sháken Aımanov atyndaǵy «Qazaqfılm» AQ-nyń prezıdenti Ermek Amanshaev Almatyda búginnen bastap qazaqstandyq prokaty bastalǵan Emır Baıǵazınniń «Aslannyń sabaqtary» fılminiń tanystyrylý rásiminde aıtty.
«Sońǵy jyldary qazaq kınemografııasynda jańa býyn qalyptasyp kele jatyr. Bul buǵan deıingi býyndardan ózgeshe qyzyqty bolyp otyr. Olar ártúrli janrda, árqıly taqyryptardy ıgerip jatyr. Ahat Ibraev, Ádilhan Meıirjanov, Jasulan Poshanov, Serik Ábishev, Emır Baıǵazın, Farhat Sháripov sııaqty talantty jas rejısserlar bar. Olardyń qataryna sondaı-aq, kınoóndiristiń ózge de mamandary enip otyr», - deıdi E.Amanshaev. Onyń aıtýynsha, bul býynnyń eń kórnekti ókili E.Baıǵazın deýge bolady. Óıtkeni alǵashqy kórkem fılmimen qazaq kınosynyń tarıhynda birinshi bop «A» synybyndaǵy halyqaralyq kınofestıvaldiń baıqaýlyq baǵdarlamasyna qatysqan buǵan deıin eshkim bolmaǵan. Ol qatysyp ǵana qoımaı, odan úzdik operatorlyq jumysy úshin «Kúmis aıý» júldesin oljalaý arqyly qazaq kınosynyń mereıin ósirdi. «Qazaqfılm» keler jyly 7-8 jańa týyndyny óndiriske shyǵarýdy josparlap otyr.
