Qazaq kilemderin saqtap qalýǵa alǵash qadam jasaǵan túrik azamattary boldy - B.Sanaqulova
sp;ASTANA. Jeltoqsannyń 9-y. QazAqparat /Gúlmıra Álıakparova/ - Qazaq kilemderinde qazaqı naqyshtardyń buzylý úderisi - Keńes Odaǵy kezinde sol ýaqyttaǵy basshylar - Lenın men Stalınniń beınelerin belgileýden bastaldy.
Bul pikirin búgin Astanada «Qazaqstanda kilem toqý óneriniń bolashaǵy bar ma?» taqyrybynda ótken semınarda QR Prezıdenttik mádenıet ortalyǵy dırektorynyń murajaı jáne ǵylymı jumystar jónindegi orynbasary Bıbinur Sanaqulova bildirdi, dep habarlaıdy QazAqparat.
B.Sanaqulovanyń aıtýynsha, qazir murajaılarda qazaq qolóner shebeleriniń qoldarynan shyqqan taqyr jáne túkti kilemder kóptep saqtaýly jáne ónerdiń bul túrin halyq arasynda nasıhattaýda murajaılardyń atqaryp otyrǵan róli zor.
Sondaı-aq ol, kilemderde qoldanylatyn sımvoldar olardyń shyǵý óńirine de baılanysty ekendigin atap ótti. Máselen, Ońtústik Qazaqstan óńirinde kóbine-kóp ósimdik tektes órnekter qoldanylsa, sol sııaqty, ata-babalar zamanynda kilemder rýlarǵa baılanysty toqylǵan kórinedi. Ókinishke qaraı, qazir ol kilemderdiń sany saýsaqpen sanarlyq.
B.Sanaqulova jeke bastyń ekonomıkalyq tabysy úshin biregeı kilemderdiń túpnusqalary shetelge arzanǵa satylyp jatqanyn tilge tıek ete kele, qazaqtyń kilemderin saqtap qalýǵa alǵash tyrysqan túrik azamattary bolǵandyǵyn qynjyla jetkizdi.
Onyń usynysy boıynsha, kilem toqý ónerin tabysty bıznes kózine aınaldyrý úshin, olardy retsiz shet elderge sata berýdiń qajeti joq. Elde saqtalǵan túpnusqalardyń shyǵý tarıhy men berer maǵynasyn jaza otyryp, sýretterimen qosa albomǵa engizip kórsetý kerek. Sonymen qatar, «qarjylyq qoldaý tabý úshin ónerdiń bul túrin «Mádenı mura» baǵdarlamasyna usynyp, urpaqtar sabaqtastyǵyn jalǵastyrý úshin arnaıy mektepter ashý qajet», - degen usynysyn bildirdi.
