«Qazaq kıbersport federatsııasy» resmı túrde jumysyn bastady
QR MSM Sport jáne dene shynyqtyrý isteri komıtetiniń baspasóz hatshysy Raýhan Toǵymbaevanyń aıtýynsha, byltyr kıbersport janashyrlarymen qurylǵan «Qazaq Cybersport Federation» respýblıkalyq qoǵamdyq birlestigi (federatsııa) QR Mádenıet jáne sport mınıstrliginiń tarapynan tanylyp, qoldaýǵa ıe bolǵan.
«Federatsııa kıbersport qoǵamdastyǵy men memlekettiń negizgi seriktesi retinde qazaqstandyq kıbersporttyń bar resýrstaryn shoǵyrlandyrý, sondaı-aq Qazaqstan kıbersportshylarynyń áleýetin halyqaralyq deńgeıde iske asyrýǵa jańa múmkindikterdi berý úshin quryldy. Federatsııanyń uıymdyq qurylymy qazaqstandyq kıbersportty álemdik deńgeıge shyǵarýǵa múddeli ár alýan saladaǵy mamandardan qurylǵan. Federatsııanyń Prezıdenti - Q. B. Esekeev, Federatsııanyń vıtse-prezıdenti - S. J. Musaıbekov, Federatsııanyń vıtse-prezıdenti - E. A. Bogatyrev E. A., Federatsııanyń bas hatshysy - A. M. Ahanov», - delingen habarlamada.
«Qazaq Cybersport Federation» respýblıkalyq qoǵamdyq birlestigi osy ýaqytqa deıin úlken uıymdastyrýshylyq jumysty atqaryp úlgergen.
«Qazirgi ýaqytta federatsııanyń 9 fılıaly ashylǵan - Astana jáne Almaty qalalarynda, sondaı-aq BQO, ShQO, Qyzylorda, Pavlodar, Jambyl jáne Qaraǵandy oblystarynda. Aldaǵy ýaqytta fılıaldardyń búkil respýblıka aýmaǵynda ashylýy josparlanýda. Federatsııa Almaty jáne Astana qalalarynda ǵana emes, aýyldyq jastardyń da áleýetin damytýǵa jeke kóńil bólýge maqsat qoıady», - deıdi Raýhan Toǵymbaeva.
Búgingi tańda kıbersportty damytýdyń keshendi maqsatty baǵdarlamasy ázirlenip, halyqaralyq beıindi uıymdardyń músheligine kirý jumystary júrgizilgen. Resmı túrde tanylǵan jáne akkredıtteýden ótken federatsııa qazirgi tańda halyqaralyq alańdarda elimizdiń múddesine ókildik etý quqyǵyna ıe. Federatsııanyń ınternet-resýrsy - www.qcf.kz.
Aıta ketsek, kıbersport dúnıejúzindegi eń qarqyndy damyp kele jatqan jańa sport túriniń biri. Kıbersportty sport túri retinde resmı túrde tanyǵan elderdiń sany ósýde: onyń ishinde AQSh, Germanııa, Reseı jáne ońtústik-shyǵys Azııa elderi bar. 2017 jyldyń qazan aıynda Halyqaralyq Olımpıada komıteti kıbersportty olımpıadalyq sport túri retinde taný máselesin qaraýǵa qabyldady. Sarapshylardyń esepteýinshe, 2017 jyly kıbersporttyń halyqaralyq naryq aınalymynyń kólemi $655 mln, al boljam boıynsha 2021 jylǵa qaraı onyń aınalymy $1,6 mlrd-tan asady. Kıbersporttyq jarystardyń aýdıtorııasy 2017 jyly 2016 jylmen salystyrǵanda 15%-ǵa - 165 mln adamǵa deıin ósken. Al 2021 jyly oıyndy tamashalaýshylar sany shamamen 300 mln adamǵa jýyqtaıtyny boljanýda.
