Qazaq kelini bolýdy armandaıtyn orys qyzy
SEMEI. QazAqparat - Semeıde memlekettik tildi óz ana tilindeı jetik meńgergen ózge ult ókilderi az emes. Solardyń biri - Dıana Mıloserdova. Qaladaǵy Medıtsına ýnıversıtetiniń 1 kýrs stýdenti ulty orys bolsa da, qazaq tilinde saırap tur. Ol tipti Abaı Qunanbaıuly men Muqaǵalı Maqataevtyń óleńderin jatqa biledi, dep habarlaıdy QazAqparat tilshisi.
Dıana 2000 jyly Shyǵys Qazaqstan oblysy Aıagóz aýdanynda dúnıege kelgen. Jastaıy¬nan qazaq balalarymen birge ósken Dıana qazaq tilin jan-jaqty meńgerýge talpynǵanyn aıtady. Qazirde maqsatyna qol jetkizgen qyz qazaq, orys, aǵylshyn tilderin jetik meńgergen.
«Men qazaq tilin qazaq balalarymen oınap júrip úırendim jáne munymen maqtanamyn. Ultymyz orys bolsa da, ata-anam meniń qazaq tilin jetik meńgersem degen nıetimdi qoldady. Solardyń arqasynda jáne qazaq dostarymynń arqasynda osy tildi úırendim»,-deıdi Dıana.
Qazaq tilindegi gazet-jýrnaldar men kitaptardy úzbeı oqýdy ádetke aınaldyrǵan Dıana poezııany unatady. Ásirese, Abaı Qunanbaıuly men Muqaǵalı Maqataevtyń óleńderin jatqa oqıdy. 8 synyptan beri aýdandyq, oblystyq, respýblıkalyq deńgeıdegi qazaq tili jáne ádebıet pánderinen ótken baıqaýlardan shet qalmaı, júldeli oryndarǵa ıe bolyp júr.
«Saıysqa qatysqan saıyn shyńdalamyn» degen ol taıaýda ýnıversıtet atynan etnostar arasyndaǵy qazaq tili saıysynda bas júldeni alǵan. Memlekettik tildi bilýiniń arqasynda kóp ishinen top jaryp júrgen qyz sonysymen maqtanady da.
«Negizi barlyq qazaq aqyndarynyń óleńderin oqımyn. Biraq Abaı atamyz ben Muqaǵalı Maqataevtyń óleńderi erekshe unaıdy. Mektep kezinen bastap qazaq tilinen ótetin baıqaýlardan shet qalmaýǵa tyrysamyn. Jaqynda Óskemen qalasynda Astananyń 20 jyldyǵyna oraı ózge ult ókilderi arasynda qazaq tilinen oblystyq baıqaý ótti, 14 qatysýshy boldy. Solardyń ishinen úzdik shyqtym»,-deıdi ol.
Dıananyń ata-anasy men baýyrlary da memlekettik tilde sóıleıdi. Sondyqtan qazaqtyń salt-dástúrleri, ádep-ǵurpyna qurmetpen qarap, ulttyq merekelerdi ataýsyz qaldyrmaıtynyn aıtady. Bolashaqta boıjetken qazaq jigitiniń jary bolýdy armandaıdy.
