Qazaq kaskaderleri Rıdlı Skottyń «Napoleon» tarıhı fılmine tústi
Qazaqstandyq kaskaderler Rıdlı Skottyń ataqty tarıhı fılminde túrli trıýkterdi oryndap, taǵy bir belesti baǵyndyrdy, dep habarlaıdy Kazinform.
Úsh kún buryn aty ańyzǵa aınalǵan rejısser Rıdlı Skottyń «Napoleon» fılmi prokatqa shyqty.
Atalǵan fılmdi túsirýge qazaqstandyq Nomad Stunts kaskaderleri de atsalysqan. Bul jaıly uıym óziniń áleýmettik jelidegi paraqshasynda habarlady.
«Qorjynymyzdy tolyqtyratyn taǵy bir joba!» dep súıinshi surady kaskaderler.
Nomad Stunts jetekshisi, QR eńbek sińirgen qaıratkeri Jandarbek Kúnǵojınovtyń aıtýynsha, olardy bul jobaǵa trıýk qoıýshy Nık Paýel usynǵan. Ol qazaqstandyq jigittermen Úndistandaǵy fılm túsiriliminde birge jumys istegen edi.
Bul jobada kaskaderlerdiń biri Murat Elkenov akter retinde de óner kórsetti. Onyń rólin Rıdlı Skottyń ózi belgilep bergen.
Qazaqstandyqtar fılmde kazaktardyń rólinde boı kórsetken.
«Napoleon» — rejısser jáne prodıýser Rıdlı Skottyń Devıd Skarpa stsenarıi jelisimen túsirilgen epıkalyq tarıhı fılmi. Napoleon Bonaparttyń bılikke kelýi jáne áıeli Djozefınamen araqatynasy jaıynda baıandaıdy.
Napoleondy Hoakın Fenıks (ári prodıýser), al Jozefınanyń rólin Vanessa Kırbı somdaıdy.
Túsirilim ótken jyldyń qańtarynda bastaldy.
Eske sala keteıik, «Nomad Stunts» kaskaderleri «Disney» túsirgen «Mýlan», Netflix-tiń «Tomırıs», «Marko Polo», «Korolge hat», «Ámir Temir», Kıaný Rıvz basty rólde oınaǵan «47 ronın», «Neýderjımye 2», «Reketır 2», «Anaǵa jol», «Shal» syndy fılmderge qatysqan.
Olar sondaı-aq HBO men Apple TV+ servısteri jáne Universal stýdııalarymen jumys jasaıdy.
Topty 2000 jyly trıýk qoıýshy, Qazaqstannyń eńbek sińirgen qaıratkeri Jaıdarbek Kúnǵojınov qurǵan bolatyn.
Nomad Stunts jetekshisi Jaıdarbek Kúnǵojınov buǵan deıin «Tomırıs» fılmindegi trıýkter úshin «Taýrýs» syılyǵyn jeńip alǵan edi.
