Qazaq ınjenerleri ázirlegen kontroller Serbııa men Qytaı zaýyttarynda tıimdiligin dáleldedi
MINSK. KAZINFORM — Qazaqstandyq energııa únemdeý tehnologııasy metallýrgııa men energetıkaǵa arnalǵan álemdegi eń úzdik-6 «jasyl» joba qataryna endi. Bul týraly Úkimettiń baspasóz qyzmeti habarlady.
«INNOPROM.Belarýs» kórmesinde «jasyl» energetıka salasyndaǵy joǵary áleýetimen halyqaralyq deńgeıde tanylǵan qazaqstandyq «Electrologic» kontrolleri usynyldy.
Ázirleme jahandyq ekologııalyq qordyń qysqa tizimine enip, 600 álemdik ótinimniń ishinen iriktelgen alty jobanyń birine aınaldy jáne Qazaqstanǵa engizýge 5,8 mln eýro kóleminde grant tarta alady.
Joba jetekshi álemdik óndirýshilerdiń jyldamdyǵynan asyp túsetin, tolyǵymen otandyq ázirlemege negizdelgen. Tehnologııa bastapqyda metallýrgııada elektr doǵaly peshterdi basqarý úshin qoldanylǵan. Onyń Serbııa men Qytaıdaǵy zaýyttarda engizilýi balqytý ýaqytyn eki esege qysqartýǵa múmkindik berdi, bul elektr energııasyn, shyǵyn materıaldaryn aıtarlyqtaı únemdeýge jáne ónimdiliktiń eki ese ósýine ákeldi.
Keıinirek ázirleýshiler tehnologııany elektr jelilerindegi shyǵyndardyń sebebi bolyp sanalatyn «teris» reaktıvti energııany basqarý máselesin sheshýge beıimdedi. Endi kontrollerdi kez-kelgen ónerkásiptik zaýyttarda jáne kommýnaldyq sektorda energııa tıimdiligin arttyrý úshin paıdalanýǵa bolady, bul ony «jasyl» ekonomıkaǵa kóshýdiń mańyzdy quraly etedi.
— Biz «Electrologic» kontrollerin apparattyq jáne baǵdarlamalyq turǵydan óndirip, ázirleýshilermiz. Olar metallýrgııa men energetıkada qoldanylady. Metallýrgııada biz metaldy balqytý ýaqytyn qysqartamyz, elektrodtardyń shyǵynyn azaıtamyz. Energetıkada — elektr energııasyn únemdeýge múmkindik beredi. Bizdiń rettegishter sheteldik analogtarǵa qaraǵanda tıimdirek jumys isteıdi. Osy rettegishterdi ornatqannan keıin, mysaly, Serbııada biz metaldy balqytýdy 45 mınýttan 26 mınýtqa deıin, Qytaıda 120 mınýttan 65 mınýtqa deıin qysqarttyq. Bul ónimdiliktiń ósýi jáne ózindik qunnyń tómendeýiniń artýy, — dep atap ótti joba jetekshisi Janat Júsipov.
Aıta ketelik Qazaqstanda óndiristik jabdyqty ınternet arqyly basqarý júıesi ázirlengen edi.