«Qazaq ınjeneriniń arqasynda álem motorsyz mashına minetin bolady» - respýblıkalyq basylymdarǵa sholý

***

«Egemen Qazaqstan» gazetiniń senbilik nómirinde Májilis depýtaty Ashat Bekenovtiń «Qazaqstanda din bólek, memleket bólek. biraq...» degen maqalasy jaryq kórdi. Bú­gingi kúngi elimizdegi dinı ahýaldyń alańda­tý­shylyǵy men aımaqtardan kelip túsken azamat­tardyń hattarynyń sebebinen qolyna qalam alǵan depýtat "ýa­habılik" aǵymnyń artynan erip ketýshilerdiń sany kóbeıip, "sáláfı" aǵymynyń keńinen na­sıhattalýy kóńilge úlken qorqynysh uıalatatyndyǵyn basa aıtqan. «Dinı ahýaldy baqylaýda ustaý úshin jergilikti atqarýshy organdar tarapynan júrgizilip jatqan sharalar óz deńgeıindegi nátıjesin bere almaýda. Óıtkeni, bul saladaǵy qyzmet zańnamalyq turǵydan qamtylmaǵan, ıaǵnı dástúrsiz dinı birlestikterdiń keıbir zańsyz áreketterine quqyqtyq tosqaýyl qoıý múmkindigi shekteýli. Al tek qana nasıhattyq jumystar arqyly qoǵamdyq sanany retteý múmkin emes. Respýb­lıkamyzdaǵy ıslam dini qyzmetkerleriniń kóbiniń dúnıetanymy bir ǵana din aınalasynda óte tar deńgeıde jáne qazirgi qoǵam ómirindegi suranysqa jaýap bere almaýy da jasyryn emes. Meshit ımamdary kezdesýler kezinde ıslam dininiń aýmaǵyndaǵy jalpy adamı qundylyqtardan basqa máselelerden aspaıdy», - deıdi depýtat.

Osy basylymda «Izvestııa» gazetinde jaryq kórgen Potsdam saıasattanýshysy Mattıas Dornfeldttiń «Qazaqstannyń saıası jeńisi» degen maqalasynyń aýdarmasy basylyp otyr. Qazaqstannyń EQYU-ǵa tóraǵalyǵy osy Uıymnyń tarıhyndaǵy óte mańyzdy kezeńmen tuspa-tus kelgenin basa aıtqan ol: «Qazaqstan Respýblıkasy - EQYU-ǵa tóraǵalyq­ty qabyldap alǵan alǵashqy postkeńestik memleket, sondyqtan da munyń ózi eldi artyqsha halyqaralyq nazardyń ortasyna qoımastan shyǵardy. Uıymǵa tóraǵalyq etýdiń múmkindigi elderdiń keń aýqymy úshin resmı moıyndalǵanyna qaramastan, ony osy kúnge deıin EO men NATO-ǵa qatysýshy memleketter ǵana atqaryp keledi. Sonymen qatar, Túrik Respýblıkasyn eseptemegende, olar hrıstıandyq memleketter edi. Sondyqtan da Qazaqstan Prezıdenti Nursultan Nazarbaev úshin eliniń EQYU tóraǵasy fýnktsııasyn qabyldap alýy ortaq demokratııalyq qundylyqtardy moıyndaıtyn batys memleketteri qaýymdastyǵymen belsendi yntymaqtastyq jolyndaǵy mańyzdy kezeń bolyp tabylady», deıdi.

***

«Jappaı qyryp-joıatyn qarýǵa qarsy kúreste qazaqstan dúnıejúzinde kósh bastap tur. Qolyndaǵy qýatty ıadrolyq arsenaldan sanaly túrde bas tartqan Qazaq eli jappaı qyryp-joıatyn qarýlardy taratpaý máselesimen ári qaraı da aınalysýdy ózine mindet etip aldy. Bul rette Memleket basshysynyń Jarlyǵymen osy jyldyń basynda Jappaı qyryp-joıý qarýlaryn taratpaý máseleleri jónindegi komıssııa quryldy. Keshe Memlekettik hatshy - Syrtqy ister mınıstri Qanat Saýdabaevtyń tóraǵalyǵymen atalmysh komıssııanyń kezekti otyrysy bolyp ótti», - dep jazady «Aıqyn» gazeti senbilik sanynda jaryq kórgen «Jappaı qyryp-joıý qarýyn taratpaý tátibi kúsheıtiledi» degen taqyryptaǵy maqalasynda. Basylymnyń atap ótýinshe, otyrys barysynda atalǵan qarýdy taratpaý salasyndaǵy kún tártibinde turǵan máseleler qarastyrylǵan. Sondaı-aq komıssııa otyrysyna qatysqan elimizdiń mınıstrlikteri men vedomstvolarynyń basshylary memlekettik organdardyń tıisti tapsyrmalardy oryndaý barysyn da talqyǵa salǵan.

«Aıqyn» gazetiniń búgingi nómirinde QR-nyń Belgııa Koroldigi men Lıýksembýrg Uly Gertsogtigindegi Tótenshe jáne Ókiletti Elshisi, Eýroodaq pen NATO janyndaǵy mıssııalarynyń basshysy Erik Ótembaevpen aradaǵy suhbat «Biz Eýropa elderiniń usynystaryn EQYU sammıti barysynda talqylaýǵa daıynbyz!» degen taqyryppen berilgen. Basylym tilshisiniń saýaldaryna egjeı-tegjeıli jaýap bergen ol: «Qazaqstan EQYU tóraǵalyǵyn tizgindegen el retinde aımaqtyq qaýipsizdik máselelerine beı-jaı qaraı almaıtynyn, halyqaralyq jáne aımaqtyq ınstıtýttar, EO arasyndaǵy baılanystyń áleýetin barynsha tıimdi qoldaýǵa múddeli», - deıdi. Ekeýara áńgimeniń tolyq nusqasyn oqyǵyńyz kelse, basylymnyń senbilik sanyn nazaryńyzdan jiberip almańyz.

«Alash aınasy» gazetiniń jazýynsha, aqtóbelik Amangeldi Shortanbaev kez kelgen kólikti janarmaısyz júıtkitip, turmystyq tehnıka quraldaryn elektr qýatynsyz jumys istetýdiń jańa ádisin oılap tapqan kórinedi. Ol úshin barlyq tehnıka quraldarynyń júregi - motordy eki túrli baǵyttaǵy magnıtpen almastyrsa bolǵany. Ideıa avtorynyń aıtýyna qaraǵanda, bir kólikti ornynan jyljytý úshin 50 shaqty shaǵyn magnıt qana qajet. «Ónertapqyshtyń aıtýynsha, kólikke starter men rotordan basqa qosalqy bólshekter qajet emes. Dál osylaı eki túrli magnıtti kez kelgen tehnıkalyq quralǵa qondyra salýǵa bolady. Máselen, úıdiń shatyryna osyndaı jobadaǵy generator qoıyp, bir úıge qajetti energııa kózin de sodan óndirip alýǵa múmkindik mol. Bul da qarapaıym tutynýshylar úshin sý tegin energııa kózi. Injener óz jobasy júzege assa, bolashaqta kóshelerde elektr baǵanalary bolmaıdy, Úkimetke de artyq shyǵyndalýdyń qajeti joq dep sanaıdy», - delingen maqalada. Jarııalanym «Qazaq ınjeneriniń arqasynda álem motorsyz mashına minetin bolady», degen taqyryppen jaryq kórdi.

AQSh-tyń Qazaqstandaǵy Tótenshe jáne Ókiletti Elshisi Rıchard Hoýglandpen aradaǵy suhbat «Alash aınasy» gazetinde «Qazaqstan osy jyly uıymǵa tóraǵalyq etý arqyly kóshbasshylyq jáne uıymdastyrýshylyq qabiletterin pash etti» degen taqyryppen jarııalandy. Basylym tilshisiniń elimizdiń EQYU-ǵa tóraǵalyǵy kezindegi qyzmetterine oraı qoıǵan barlyq saýaldaryna tuşymdy jaýap bergen Elshi: «Qazaqstannyń bıylǵy bul uıymǵa tóraǵalyǵyn da, shynymen, tarıhı oqıǵalar qataryna jatqyzýǵa bolady. Amerıka Qurama Shtattary bul sammıtti sátti ótkizý úshin Astanadaǵy áriptesterimen birlese jumys isteý múmkindigin shyn yqylaspen paıdalanýǵa ázir»,- deıdi.

***

«Parlament Senatynyń tóraǵasy Qasym-Jomart Toqaev Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Chjoý Lıdi qabyldady», dep jazady «Kazahstanskaıa pravda» gazeti. Dıplomatty elshi laýazymyna taǵaıyndalýymen quttyqtaǵan Tóraǵa onyń qyzmeti bizdiń elderimiz arasyndaǵy kóp tarapty yntymaqtastyqty nyǵaıtýǵa járdemdesetinine senim bildirgen. Sondaı-aq Qazaqstan-Qytaı qarym-qatynastaryndaǵy qol jetken saıası senim men ekonomıkalyq yntymaqtastyqtyń joǵary deńgeıin atap óte kelip, Q.Toqaev: «Baılanystardyń óristeı túsýi bizdiń memleketter basshylarynyń ózara saparlarymen aıqyndalady jáne eki halyqtyń múddelerine tolyǵymen saı keledi», dedi.