Qazaq hokkeıshisi - QHL-diń úzdik shabýylshysy
ASTANA. 27 qyrkúıek. QazAqparat - «Barys» hokkeı klýbynyń shabýylshysy Talǵat Jaılaýov Qurlyqtyq hokkeı lıgasynyń úzdik shabýylshylary tiziminde birinshi orynǵa kóterildi.
QHL-diń resmı saıty habarlaǵandaı, hokkeıdegi «gol-pas» júıesi boıynsha T.Jaılaýov 13 upaı jınady. Jańa maýsym bastalǵaly beri ol úsh shaıba soǵyp, 10 nátıjeli pas berdi. Atap aıtqanda, «Avangardpen» bolǵan oıynda T.Jaılaýov bir shaıbamen kózge tússe, «Avtomobılıstke» qarsy matchta eki birdeı shaıbanyń avtory atandy. Al keshe «Donbasspen» ótken oıynda ol taǵy eki nátıjeli pas berip, «Barysty» jeńiske jeteledi. Búginde Qurlyqtyq hokkeı lıgasynyń úzdik shabýylshylary tiziminde T.Jaılaýov kósh bastap tur. Onyń áriptesi - Nadjel Doýs úshinshi orynda.
Aıta keteıik, Qurlyqtyq hokkeı lıgasynda óner kórsetip júrgen Astana qalasynyń «Barys» hokkeı klýbynda qazaqtyń tek bir hokkeıshisi ǵana oınap júr. Ol - Talǵat Jaılaýov. Odan bólek, Nursultan Belgibaev pen Danııar Qaıyrov ta bar. Alaıda olar muz aıdynyna shyqpaı júr.
