«Qazaq handyǵynyń tarıhy» saıty ashyldy
ALMATY. 2 tamyz. QazAqparat - Búgin Almatydaǵy ál-Farabı atyndaǵy Qazaq ulttyq ýnıversıtetinde «Qazaq handyǵynyń tarıhy» dep atalatyn ǵylymı-kópshilik sıpattaǵy saıttyń (www.kaztar.kaznu.kz) ashylý rásimi ótti.
«Saıt 6 bloktan turady. Birinshisi - «Qazaq handary»; ekinshisi - «Qazaq handyǵynyń kezeńderi»; úshinshisi - «Qazaq qoǵamy»; tórtinshisi - «Qazaq handyǵy jáne kórshi memleketter»; besinshisi - «Qazaq handyǵy dáýirindegi tulǵalar»; altynshysy «Qazaq handyǵy: derekter men zertteýler» dep atalady. Oǵan qazirgi tańda 33 maqala endi. Aldaǵy ýaqytta áli de tolyqtyrylady jáne saıt oqyrmandary úshin keri baılanyspen tyǵyz jumys isteıtin bolamyz», - deıdi saıt jetekshisi, professor, tarıh ǵylymdarynyń doktory, QR Ulttyq ǵylym akademııasynyń korrespondent-múshesi Bereket Káribaev. Onyń aıtýynsha, bul - QR Memlekettik hatshysy Marat Tájınniń «Tarıh tolqynyndaǵy halyq» atty baıandamasyndaǵy tujyrymdamalardy, kórsetilgen mindetterdi júzege asyrýǵa ýnıversıtet tarıhshylarynyń atsalysýynyń bir kórinisi.
«Biz az ýaqyt ishinde derbes el retinde tanyldyq. Endi tarıhty qaıta qarap, tek derek jınamaı, órkenıettegi úlesimiz qandaı ekenin saralaýymyz qajet. Qazirgi ýaqytta tarıhshylarymyz ulttyq sanany, ulttyq ıdeıany qalyptastyrýda úlken is atqarýda. Bul baǵytta Qazaqstandaǵy irgeli, jetekshi joǵary oqý retinde bizdiń ýnıversıtet te az ýaqytta biraz jetistikterge jetti. Buǵan deıin bizde «Nomad» ortalyǵy men «Atılla» halyqaralyq ortalyǵy qurylǵan edi. Búgin mine saıt ashyp otyrmyz. Bul óskeleń urpaqty otanshyldyqqa tárbıeleýge zor úles qosady dep senemin», - deıdi ál-Farabı atyndaǵy QazUÝ rektory Ǵalym Mutanov. Onyń sózine qaraǵanda, bul saıttaǵy barlyq málimetter qazaq tilinde jazylǵan. Bolashaqta ony orys jáne aǵylshyn tilinde de júrgizý josparlanyp otyr.
