Qazaq handyǵynyń 550 jyldyǵyna oraı ótetin «Eýrazııa Barysy» týrnırine 8 eldiń palýandary qatysady

ASTANA. QazAqparat - «Qazaqstan Barysy» qazaq kúresin damytý qory, Qazaqstan Respýblıkasy qazaq kúresi federatsııasy, Sporttyq jekpe-jek jáne kúsh qoldanylatyn sport túrleri konfederatsııasy, Jambyl oblysy ákimdigi men QR Mádenıet jáne sport mınıstrliginiń qoldaýymen ІІІ Qazaq kúresinen halyqaralyq «Eýrazııa Barysy» týrnırin ótkiziledi. Týrnır Qazaq handyǵynyń 550 jyldyǵyna oraı, 9 qazanda Taraz qalasyndaǵy «Taraz-Arena» sport kesheninde ótedi. Bul týraly qazaq kúresi federatsııasynyń baspasóz qyzmetinen habarlandy.

«Bozkilemde Grýzııa, Qazaqstan, Qyrǵyzstan, Mońǵolııa, Polsha, Reseı, Túrkııa jáne Ózbekstan elderiniń komandalary kezdesedi dep kútilýde. Árbir quramada jeti balýan kúresedi. Bıylǵy erekshelik salmaq dárejesinde birqatar ózgerister bar. «Eýrazııa Barysynda» balýandar komandalyq synda 55 keli, 66 keli, 74 keli, 82 keli, -90 keli, -100 keli jáne +100 keli salmaq dárejesinde kúresedi. Týrnırde qazylyq jasaıtyn halyqaralyq tóreshiler quramynda qatysatyn memlekettiń ókilderi de kiredi», delingen baspasóz baıanynda.

Qazaq kúresinen halyqaralyq «Eýrazııa Barysy» týrnıri eń alǵash ret 2013 jyldyń jeltoqsan aıynda ótken bolatyn. Oǵan Eýrazııa qurlyǵynyń 8 memleketinen balýandar qatysty. Bul jarys «Qazaqstan Barysy» qazaq kúresin damytý qorynyń «Qazaqstan Barysy» men «Jas Barys» jobasynan keıin qolǵa alǵan úshinshi jobasy. 2013 jylǵy týrnır jeńimpazdary otandastarymyz - Qazaqstan quramasy. Olar fınalda Mońǵolııa quramasynan 4:1 esebimen basym tústi. Ekinshi ret uıymdastyrylǵan týrnır 2014 jyldyń qarasha aıynda Balýan Sholaqtyń 150 jyldyq mereıtoıyna arnaldy. Oǵan Ázerbaıjan, Qytaı, Grýzııa, Qazaqstan, Qyrǵyzstan, Mońǵolııa, Polsha, Reseı, Tájikstan, Túrkııa, Ózbekstan jáne Ýkraına elderiniń komandalary qatysty. Fınalda ekinshi ret Mońǵolııa quramasy Qazaqstan quramalary kezdesip, mońǵol balýandary jeńimpaz atandy.

«Eýrazııa Barysy» halyqaralyq týrnırin tikeleı efırde 7 saǵat boıy álemniń 126 memleketi tamashalady. Bıylǵy halyqaralyq kórsetilimdide túrkııalyq «TRT Avaz» ben reseılik «Boets» arnalary tikeleı efırde usynatyn bolady.Al elimizde «Qazaqstan», «KazSport» jáne «KTK» arnalary kórsetedi.