Qazaq Handyǵynyń 550 jyldyǵyna arnalǵan telehıkaıa kúzde shyǵady - mınıstr

ASTANA. QazAqparat - Qazaq Handyǵynyń 550 jyldyǵyna arnalǵan telehıkaıa bıyl kúzde shyǵady. Bul týraly búgin halyqpen eseptik kezdesý ótkizgen QR Mádenıet jáne sport mınıstri Arystanbek Muhamedıuly málim etti.

«Bıyl biz Qazaq Handyǵynyń 550 jyldyǵyna arnalǵan ózimizdiń ulttyq telehıkaıamyzdy shyǵarýdy josparlap otyrmyz. Biz azdap onyń kólemin ulǵaıttyq. Týyndyny óte úlken etip túsirdik. Endi ony úlken ekrandarda kórsetý úshin úlken tehnıkalyq jumys atqarylýy tıis. Qazir jumys qarqyndy júrip jatyr. Meniń oıymsha, kúzde bul týyndy prokatqa shyǵyp qalýy kerek», - dep atap ótti mınıstr.

Sonymen qatar, mınıstrdiń aıtýynsha, reseılik rejısserdiń túsirýimen «28 panfılovshy» atty fılmniń túsirilimi júrgizilýde. Sondaı-aq qazaqstandyq jáne qytaılyq kınogerlerdiń áriptestik ornatýymen birlesken jobalar qolǵa alynbaq.

«Qazirgi ýaqytta mınıstrlik úkimettiń tapsyrmasymen Qazaqstannyń kınoındýstrııasyn damytý tujyrymdamasyn daıyndaýda. Bul salany jańa deńgeıge shyǵaratyn kez keldi», - dedi A.Muhamedıuly.