Qazaq handyǵynyń 550 jyldyǵyna arnalǵan «Tarıh pen til tamyrlas» jyr músháırasy jarııalandy

ASTANA. QazAqparat - Qazaqstan halqy tilderiniń XVII qalalyq festıvali aıasynda Astana qalasynyń tilderdi damytý basqarmasy Qazaq handyǵynyń 550 jyldyǵyna arnalǵan «Tarıh pen til tamyrlas» atty jas aqyndar músháırasyn ótkizedi.

Músháıranyń maqsaty - ulttyq tarıhty ulyqtaý, tildiń tereńdigin tanytý, memlekettilik pen eldikti qalyptastyrýdaǵy qos uǵymnyń mańyzdylyǵyn jas urpaqtyń sanasyna sińirý. Sondaı-aq jas aqyndardyń poezııa ónerine qoldaý kórsete otyryp, tarıhı-ádebı shyǵarmashylyqqa jumyldyrý da kózdelgen. Músháıra eki kezeńnen: irikteý kezeńi jáne qorytyndy kezeńinen turady. Qatysýshylar Qazaq handyǵynyń 550 jyldyǵyna arnalǵan óz óleńderin usynýy kerek. Músháıraǵa 14-29 jas aralyǵyndaǵy jas aqyndar qatysa alady. Oqylatyn shyǵarmalar kólemi 2-3 mınýttan aspaýy tıis. Jastar músháırasyna qatysýǵa ótinishter men óleńder 15 qyrkúıekke deıin qabyldanyp, irikteledi, nátıjesi úmitkerlerge 16 qyrkúıek kúni habarlanady. Qorytyndy saıys 22 qyrkúıekte ótkiziledi. Qazylar aqyndardyń sóz qoldanysyna, óleńniń mazmuny men tereńdigine, uıqasyna, kórkemdik ereksheligine, taqyrypty ashý sıpatyna, shyǵarmalaryn oqý sheberligine, til tazalyǵyna, sahna mádenıeti men kıimine nazar aýdarady. Jeńimpazdar baǵaly syılyqtarmen, dıplom jáne alǵyshattarmen marapattalady. Músháıraǵa qatysý týraly tolyq maǵlumatty 55-67-25, 8 775 335 04 14 baılanys telefondary arqyly bilýge bolady.