Qazaq handyǵynyń 550 jyldyǵyna arnalǵan marka shyqty (FOTO)

ASTANA. QazAqparat - Búgin «Qazposhta» AQ Qazaq handyǵynyń 550 jyldyǵyna arnalǵan poshtalyq markany aınalymǵa engizdi. Osyǵan oraı QR Ulttyq murajaıynda ótken saltanatty sharaǵa QR Premer-Mınıstriniń orynbasary Berdibek Saparbaev arnaıy qatysty.

«Aǵymdaǵy jyly biz Qazaq handyǵynyń 550 jyldyq mereıtoıyn keńinen atap ótýdemiz. Ózderińiz de biletindeı, ótkeni joq eldiń bolashaǵy bulyńǵyr. Tarıhy joq el bolmaıdy. Búgingi «Qazposhtanyń» 550 jyldyq mereıtoıymyzǵa arnalǵan jańa poshta markasyn shyǵarýy óte jaqsy shara. Bul - «Qazposhta» basshylyǵynyń, mınıstrlik tarabynyń bizdiń tarıhymyzdy, qazaq memlekettigin barsha álemge pash etýi», - dedi B.Saparbaev.

Markanyń ólshemi 52*36 mm, al paraǵynyń ólshemi 156*148 mm. Bir paraqta 6 marka bar. Poshta markasynyń ataýly baǵasy 550 teńgeni quraıdy. Taralymy 5040 dana. Sýretin R.Ahmedın salǵan. Marka «Qazaqstan Respýblıkasy Ulttyq bankiniń banknot fabrıkasy» respýblıkalyq memlekettik kásipornynda basyp shyǵarylǵan.