Qazaq handyǵynyń 550 jyldyǵyna arnalǵan marafon qatysýshylary Astanaǵa jetti (FOTO)

ASTANA. QazAqparat - Qazaq handyǵynyń qurylýyna 550 jyl tolýyna oraı uıymdastyrylǵan marafon tamyz aıynyń 1-inde Aqmola oblysy Býrabaı aýdanynyń Abylaı han mekeninen bastalǵan jáne týra 550 shaqyrymǵa sozylady. Úsh júzdiń basyn biriktirgen uly Abylaı han mekeninen osy marafonnyń bastalýy da tegin emes, árıne. Tarıhqa tereń boılasaq osy kıeli dalada han Buhara men Qytaı elshilerin qabyldap, óziniń bıligin júrgizgen desedi.

Aqmolalyq eki jeńil atlet - Balǵabaı Kúlpeıisov pen Qalıbek Ábilov 10 kúnge sozylatyn marafondy Qazaq handyǵynyń 550 jyldyǵyna arnap júgirip ótpek.

- Osy marafon arqyly Qazaq handyǵynyń 550 jyldyǵyna arnalǵan iri mádenı sharalarǵa óz úlesimizdi qosqymyz keledi. Bul, árıne, eń aldymen babalar rýhyna etken taǵzymymyz. Basty maqsatymyz - jastardy patrıottyq baǵytta tárbıeleý, olardy salaýatty ómir saltyn ustanýǵa tartý jáne buqaralyq sportty damytý, - deıdi jeńil atlet Qalıbek Ábilov.

Marafonshylar tań shapaǵy qylań bergen sátten aqsham túskenge deıin júgiretinderin aıtty. Bul sharaǵa olar jarty jyl kóleminde daıyndalǵan. Atap óteıik, atalmysh marafon Aqmola oblysynda bastalyp Astana arqyly Qaraǵandy oblysyna, odan keıin kıeli Ulytaý jerine jetýdi kózdeıdi, dep habarlaıdy elorda ákimdiginiń baspasóz qyzmeti.