Qazaq handyǵynyń 550 jyldyǵyn Omby qazaqtary «Toı dýmanmen» atap ótpek

ALMATY. QazAqparat - Ombydaǵy qazaq mádenıeti men sportyn nasıhattaýǵa baǵyttalǵan dástúrli «Toı dýman» merekesi bıyl Qazaq handyǵynyń 550 jyldyǵyna arnalmaq.

Bul týraly Dúnıejúzi qazaqtary qaýymdastyǵynyń ókili Kúlǵazıra Baltabaeva aıtty.

«Móldir» sibirlik qazaq mádenıeti ortalyǵy aǵymdaǵy jylǵy V «Toı dýmandy» 14 maýsymda «Agro-Omby» oqý-kórme kesheni aýmaǵynda ótkizbek.

Bıylǵy mereke Qazaq handyǵynyń 550 jyldyǵy men Jeńistiń 70 jyldyǵyna arnalyp otyr. Byltyr bul shara Baıbolat batyrdyń týǵanyna 320 jyl tolýyna jáne Er Jánibek pen Baıan batyrlardyń 300 jyldyǵyna arnalǵan bolatyn.

Shara aıasynda qazaqtyń ulttyq oıyndarynan saıys, qazaq kúresinen týrnır, Ombydaǵy qazaq óner ujymdarynyń kontserti, qazaq ulttyq qolóner buıymdarynyń kórmesi ótedi.

Sondaı-aq, qazaqtyń ulttyq taǵamdaryn əzirleýden sheberlik klastary, "Jigit sultany" baıqaýy ótkiziledi.

"Toı dýman syrtta júrgen qazaqtardyń otanyna degen saǵynyshyn basýǵa, qazaq jastarynyń tarıhı sabaqtastyǵyn qalyptastyrýǵa, ulttyq tamyrynan ajyrap qalmaýǵa septigin tıgizbek",- dedi joba avtory "Móldir" uıymynyń jetekshisi Altynaı Júnisova.