Qazaq handyǵynyń 550 jyldyǵyn merekeleý úshin elimizdiń óńirlerinen delegatsııalar elordaǵa keldi
Bul týraly Astana qalasy mádenıet basqarmasy habarlady.
«Qazaq Eli» alańynda 50 kıiz úı tigilip, eki úlken sahna, sport alańdary, altybaqandar, taıqazan jáne t.b. ornatyldy. Uıymdastyrýshylar qala turǵyndary men qonaqtarynyń nazaryna qyzyqty oıyn-saýyq jáne kontserttik baǵdarlama usynady. Aqmola, Aqtóbe, Almaty, Atyraý, Shyǵys Qazaqstan, Batys Qazaqstan, Qaraǵandy, Qostanaı, Qyzylorda, Mańǵystaý, Pavlodar, Soltústik Qazaqstan, Ońtústik Qazaqstan oblystary, sonymen qatar Astana men Almaty qalalarynyń úzdik shyǵarmashylyq ujymdary úsh kún boıy óz ónerlerin ortaǵa salady.
Elimizdiń ár óńiri úzdik horeografııalyq ujymdardyń, ansamblderdiń, halyq jáne estrada óneri solısteriniń qatysýymen ótetin kontserttik baǵdarlamadan basqa, kórermender nazaryna «Qazaqstannyń ejelgi qalalary» beınetanystyrylymy, «Qazaq ulttyq kıiminiń tarıhy arqyly halyq tarıhyn jetkizý» atty sán festıvali, «Sıqyrly bı álemi» bı festıvali, «Birligimiz jarasqan» atty Qazaqstan halqy dostyǵy kontserti, «Ǵasyrlar úni» etno-kontserti usynylady. Budan basqa, etnoaýylda jetim balalarǵa arnalǵan ekskýrsııa jáne astanalyq daryndy jastardyń qatysýymen kontsert ótkiziledi.
Etnoaýylda qazaq kúresi, arqan tartý, toǵyz qumalaq, buqa tartys, arqan tartys, asyqatý syndy ulttyq sport túrlerinen jarystar uıymdastyrylady. Jeńimpazdar dıplomdarmen jáne baǵaly syılyqtarmen marapattalady. Merekelik sharalar baǵdarlamasyna sándik-qoldanbaly óner kórme-jármeńkeleri, halyq sheberleriniń sheberlik dáristeri engizildi.
Barlyq oblystardyń ulttyq kıim kıgen ókilderiniń sherýi úsh kúnge jalǵasatyn merekeniń kórkin keltirmek. Parad 12 qyrkúıekte saǵat 10.00-da «Qazaq Eli» monýmentiniń aldyndaǵy alańda ótedi.Osy kúni saǵat 19:00-da óńirlerdiń eń úzdik nomerleri gala-kontsertte kórermender nazaryna usynylady.
