Qazaq handyǵynyń 550 jyldyǵy mereıtoıyna demeýshiler jumyldyrylyp jatyr
Mereıtoılyq negizgi sharalardy Elbasynyń qatysýymen 2015 jylǵy qyrkúıekte Astana jáne Taraz qalalarynda ótkizý josparlanyp otyrǵanyn jetkizgen ol, «Taraz qalasynda mádenı- sporttyq jáne buqaralyq is-sharalar, saltanatty jınalys, merekelik kontsert, ǵylymı-tájirıbelik konferentsııalar ótedi, sondaı-aq osyndaı sharalar Astana qalasynda da ótkiziledi. Búginde osy is-sharalardy ótkizý úshin jan-jaqty daıyndyq jumystary júrgizilýde», - dedi.
Qazaq handyǵyna 550 jyl monýmentiniń úzdik jobasyna respýblıkalyq baıqaý jarııalanyp, onyń ishinen úzdik joba tańdalǵanyna toqtalǵan jaýapty hatshy, «Qazirgi ýaqytta monýment ornatylatyn jerde qurylys jumystary júrgizilýde», - dedi.
Budan buryn habarlanǵandaı, atalǵan monýment Taraz qalasynda ornatylady.
Qýatjan Ýálıevtiń sózine qaraǵanda, respýblıkalyq mańyzy bar tarıhı jáne mádenıet eskertkish bolyp tabylatyn kóne Taraz qalashyǵynda arheologııalyq zertteýler, restavratsııa jáne konservatsııa jumystaryn júrgizý bastaldy.
«Munymen qosa, Qazaq handyǵynyń 550 jyldyǵy mereıtoıyna arnalǵan is-sharalardy qarjylandyrýǵa demeýshilerdi jumyldyrý jumysy boıynsha Mádenıet jáne sport mınıstrligi, Jambyl oblysynyń ákimdigi jáne basqa memlekettik organdar tıisti jumystar júrgizýde. Osy baǵytta demeýshilermen jumystardy úılestirý jáne tıimdi júrgizý maqsatynda arnaıy «Máńgilik el» qoǵamdyq qory quryldy. Qoǵamdyq qordyń qyzmetin Myrzataı Joldasbekov, Anatolıı Bashmakov, Serik Sápıev, Aıman Musahodjaeva sııaqty kórnekti memleket jáne qoǵam qaıratkerleri, tanymal sport jáne óner qaıratkerlerinen quralǵan quryltaıshy keńes baqylaýda»,- dedi jaýapty hatshy.
Bul turǵyda ol demeýshilik kompanııalar mereıtoı sharalaryna qatysyp jatqandyǵyn jetkizdi.
