Qazaq handyǵy týraly serıalǵa Qytaı men AQSh mamandary qatysady
ASTANA. QazAqparat - Qazaq handyǵy týraly kópserıaly fılm tarıhı kıno salasynda tájirıbesi mol Qytaı, AQSh mamandarynyń qatysýymen túsirilýi múmkin. Bul týraly QazAqparat HAA-nyń resmı suratýy boıynsha, Mádenıet jáne sport mınıstrliginen habarlady.
«Qazaqfılm» kınostýdııasynda Qazaq handyǵy týraly serııal ázirlený ústinde. Belgili prodıýsser, rejısserlardan (T.Jaqsylyqov, S.Elýbaı, R.Nuǵmanov, I.Ahmet, A.Asenov, A.Sataev, R.Ábdrashev) turatyn jumys toby quryldy. Alǵashqy túsirilim jumystary 2015 jyly bastalyp, fılm qazaq tilinde túsiriledi. Orys tilinde dýblıaj jasalmaq.
Sonymen qatar, QazAqparat vedomstvoǵa saýalynda túsirilgen fılmdi bolashaqta ózge elderdiń telearnalarynan kórsetý múmkindigin surady. Mınıstrliktiń habarlaýynsha, áriptestik ornatqan elderdiń telearnalarynda kórsetilýi múmkin. Olardyń qatarynda Túrkııa, Reseı, BAÁ, Mysyr, Iordanııa, Grekııa, Izraıl, Taıvan, Sıngapýr jáne taǵy basqalary bar. Qytaıdyń CCTV telearnasymen kelissózder júrgizilýde. Vedomstvonyń habarlaýynsha, bul jalǵyz tarıhı kınotýyndy ǵana bolyp qalmaq emes. Mınıstrlikte «Máńgilik el» ulttyq fılmder óndirisi boıynsha, arnaıy baǵdarlama jasaldy. Atalǵan joba boıynsha, Qazaqstannyń jetekshi mamandarynyń qatysýymen 2015-2017 jyldar aralyǵynda tanymal janrlarda fılmder men serıaldar túsirilý kózdelgen.
