Qazaq handyǵy týraly serıaldy túsiretin rejısser bıylǵy jeltoqsanda belgili bolady

ASTANA. QazAqparat - Qazaq memlekettiliginiń 550 jyldyǵyn atap ótý aıasynda Qazaq handyǵy týraly túsiriletin telehıkaıanyń rejısserlik toby jyldyń sońyna qaraı belgili bolady. Bul týraly búgin Ortalyq kommýnıkatsııalar qyzmetindegi brıfıngte QR Mádenıet jáne sport mınıstri Arystanbek Muhamedıuly málim etti.

«Qazirgi kezde birneshe rejısserlik-stsenarıılik top quryp jatyrmyz. Osy oraıda ózimizdiń Aqan Sataev, Rústem Ábdirashov sekildi jaqsy rejısserler bar, sonymen qatar «Gromovtardy» túsirgen Baqyt Qılybaevty shaqyryp jatyrmyz», - dedi mınıstr. A.Muhamedıulynyń aıtýynsha, «Shyńǵyshan» fılminde túsken jáne ózge de týyndylarda tarıhı tulǵalardy somdaǵan akterlerdi shaqyrtý qarastyrylyp otyr. «Serıaldy túsirýdiń ózindik ereksheligi bar. Osy oraıda bul baǵyttaǵy mamandardy keńinen tartyp jatyrmyz. Qazaq handyǵy týraly serıaldy túsiretin naqty rejısserlik top jaıynda bıylǵy jeltoqsanda habarlanady», - dedi mınıstr. Budan buryn habarlanǵandaı, Mádenıet jáne sport mınıstri aldaǵy jyly Qazaq handyǵyna baılanysty ǵylymı konferentsııalar, derekti jáne kórkemdik fılmder shyǵatyndyǵyn habarlady. Onyń ishinde Elbasynyń tapsyrmasymen Qazaq handyǵyna arnalǵan 20 cerııaly úlken telehıkaıa túsiriledi. Osy oraıda ol bul baǵytta tıisti jumystar bastalǵanyn aıta kele, «2015 jyldyń qańtarynan bastap bul serıaldardy túsirýdi iske asyramyz», - dedi.