Qazaq handyǵy týraly fılmdi kınoteatrdan kórgender óz áserimen bólisti
ASTANA. QazAqparat - Búgin «Qazaq eli» jobasynyń alǵashqy bólimi - «Almas qylysh» fılmi prokatqa shyqty. QazAqparat tilshisi tarıhı týyndyny kınoteatrdan birinshi bolyp tamashalaǵan kórermenderdiń pikirlerin jazyp aldy.
«Bul kıno óte kúshti túsirildi. Qazaq handyǵynyń tarıhtaǵy ornyn jaqsy kórsete bildi. Biz nemerelerimizdide alyp keldik. Sebebi jastar osyndaı fılmderdi kórýi kerek, óz tarıhyn bilýi kerek. Shyny kerek, qazaqqa rýh beretin fılm, ulttyq sanany serpiltetin týyndy»,- deıdi Erkin Qusaıyn. Otaǵasy otbasymen birge Almatydan qonaqqa kelgen eken. «Almas qylysh» fılmi prokatqa shyǵady degendi estigen boıda birden alǵashqy seansqa bılet alǵan. «Iá, biz de, balalar da kóp maǵlumat aldyq. Bárimiz týra sol tarıhı kezeńge sapar jasap, óz kózimizben kórgendeı boldyq. Bul fılmdi kınoteatrda ǵana emes, mektep oqýshylary da, stýdentter de kórse eken deımiz. Tarıhı sanamyzdy oıatatyn fılm eken», - deıdi aǵanyń jubaıy Esimhan Qusaıyn.
«Bul fılm buryn oqyǵan kitabymyzdan da keremet boldy dep otyrmyn. Óte jaqsy túsirilgen. Dekoratsııasynda tamasha jasaǵan. Bizge qatty unady», - deıdi Áıken Ospanova. «Ony kútkenimizge kóp boldy ǵoı. Minekı, búgin tarıhymyzdy bilsin dep, bala-shaǵamyzdy ádeıi alyp keldik. Ata-babamyzdyń qany tógildi dep, qansha aıtqanmen ol báribir kórgendeı bolmaıdy. Sondyqtan osy fılmdi asyǵa kúttik. Ony óte jaqsy túsirgen eken. Tarıhymyzdy aıshyqtap, óziniń taǵylymy men ónegesi mol dúnıe eken. Jalpy, fılm unady. Mazmuny da, arnaıy effektileri de tamasha. Qazaq kınolarynyń osyndaı álemdik dárejede túsiriletindeı jaǵdaıǵa jetkenine óte qýanyshtymyz.Sondyqtan osy ispetti fılmder kóbeıe bersin», - deıdi apaıdyń úlken uly Ardaq Ospanov.
