«Qazaq handyǵy» telehıkaıasy 19 naýryzda kórsetiledi

Naýryz merekesine oraı 19 naýryzda «31 telearnada» QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jáne «Centaurus Rustem Abdrashev production»  JShS-nyń qatysýymen túsirilgen «Qazaq handyǵy» tarıhı serıalynyń televızııalyq kórsetilimi bastalady.

Bul aýqymdy tarıhı jobanyń avtory - QR Prezıdenti N. Á. Nazarbaev. Fılmniń stsenarııi Іlııas Esenberlınniń «Almas qylysh» romanynyń jelisi boıynsha  jazylǵan. Fılmniń rejısseri - Qazaqstan Respýblıkasynyń eńbek sińirgen qaıratkeri, kınorejısser, stsenarıst jáne sýretshi Rústem Ábdirashev.

 - Hıkaıanyń kıno nusqasy - «Almas qylysh» fılmi keıbir otandastarymyzdyń tarıhqa degen qyzyǵýshylyǵyn oıatty. «Qazaq handyǵy» serıalynda fılmge kirmeı qalǵan tartymdy epızodtar men qyzyqty oqıǵalar óte kóp, sondyqtan da bul hıkaıa kórermenderdiń kóńilinen shyǵatynyna kúmánim joq, - dedi rejısser Rústem Ábdirashev.  

«Qazaq handyǵy» tarıhı hıkaıasynyń birinshi bólimin osy jeksenbide, naýryzdyń 19 kúni saǵat 22:00-de «31 arnadan» tamashalaýǵa bolady.

Esterińizge sala ketsek, «Qazaq handyǵy» serıalynyń kıno nusqasy - «Almas qylysh» fılminiń tusaýkeseri byltyrǵy jyly Qazaqstan Táýelsizdiginiń 25 jyldyǵyn atap ótý kúnderi Astana jáne Almaty qalalarynda ótken bolatyn. 2017 jyly  5 qańtarda jalpyulttyq prokatqa shyqqan atalmysh tolyqmetrajdy kórkem fılm, qazaqstandyq prokatta 72 mln-nan astam qarjy jınap, kóshbasshylar qatarynan kórindi. Jalpy alǵanda 2,5 myńnan astam seans, onyń 60% qazaq tilinde, al 40% orys tilinde kórsetildi.

Fılmniń túsirilim jumystary Almaty jáne Almaty oblysynda ótken. Túsirilimniń bir bóligi «Qazaqfılmniń» pavılondarynda qurylǵan dekoratsııalarda, sonymen qatar kınostýdııanyń aýmaǵynda sýretshiler turǵyzǵan Shaıbanshahtyń saraıynda ótken. Fılmdi jasaýǵa 500-den astam adam jumyldyrylǵan. Túsirilim bes aıǵa sozyldy.

Fılm týraly:HV ǵasyrdyń orta tusy. Qara teńiz jaǵalaýynan Mońǵolııaǵa deıingi Eýrazııa keńistiginde bir kezde zor qýatty ımperııa bolǵan Altyn Orda qulaǵannan keıin birneshe jeke handyqtar quryldy. Olardyń ishinen qazirgi Qazaqstannyń aýmaǵyn jaılap jatqan Aq orda erekshelendi. Aq orda bıligi  Shyńǵys hannyń nemeresi,  Joshynyń úlken uly Orda Ejenniń áýletine tıesili boldy. Arada ýaqyt óte kele Shaıbanıtterdiń kishi tarmaǵynan shyǵatyn Ábilqaıyr óz bıligin kúsheıtip, jeke handyq qurdy. Ol kóshpendilerge qatygez, aıaýsyz saıasat ustanǵan bolatyn.

1460 jyl. Orda Ejenniń urpaqtary- Kereımen Jánibektiń aınalasyna birikken  ondaǵan myń kóshpendiler aqsaqaldar keńesinde sheshim qabyldap, Ábilqaıyrdan bólinip shyǵady. Sultandar Moǵolstannyń shekarasyna deıin jetkende, jergilikti bıleýshi Esen-buǵa olarǵa qonys berýge kelisedi. Esimi ańyzǵa aınalǵan abyz Asan qaıǵy da kóshke ilesip, bólinip shyǵýǵa sebep bolǵan oqıǵalardy jyryna qosady.

Jánibek pen Kereı Ábilqaıyrdyń handyǵynan bólinip, óz ulystaryn qurýǵa bekindi. Kereı men Jánibekke qosylǵan rýlardyń basshy-bıleri quryltaı ótkizedi. Eń aldymen, judyryqtaı jumylǵan yntymaq kerek ekenin eskergen olar Kereıdi han saılap, Qazaq handyǵynyń qurylǵanyn pash etedi. 

Qoıýshy-rejısseri: Rústem Ábdirashov

Stsenarıı avtorlary: Smaǵul Elýbaı, Tımýr Jaqsylyqov, Rústem Ábdirashov

Qoıýshy sýretshileri: Ómirzaq Shmanov, Sábıt Qurmanbekov, Edil Núsipov pen Jannat Baımuqanovanyń qatysýymen

Qoıýshy operatorlary: Sapar Koıchýmanov, Aleksandr Plotnıkov jáne Andreı Maslov.

Kompozıtory: Ábilqaıyr Ábdirash

Basty rólde: Qaırat Kemalov, Erkebulan Daıyrov, Doshan Joljaqsynov, Iisbek Ábilmájınov, Aıan Ótepbergen, Meıirǵat Amangeldın, Nııazbek Shaısultanov, Bekbolat Tileýhan, Arman Qoja, Shuǵyla Saparǵalıqyzy, Madına Esmanova, Qarlyǵash Muhamedjanova, Іńkár Ábdirash, Dinmuhamed Aqymov jáne basqalar.