«Qazaq handyǵy» serıalynyń túsirilimi Túrkistanda jalǵasýda
ASTANA. QazAqparat - Osy kúnderi Túrkistan qalasyndaǵy «Áziret Sultan» memlekettik tarıhı-mádenı qoryq-mýzeıinde «Qazaq handyǵy. Altyn taq» atty aýqymdy kınojobasynyń ekinshi maýsymy túsirilip jatyr. Túsirilim toby «Qazaq handyǵy» serıalynyń túsirilim alańynan eksklıýzıvti fotosýretterimen bólisti, dep habarlaıdy QazAqparat tilshisi.
«Qýanyshymyzǵa oraı, Túrkistandaǵy túsirilimder qasıetti Oraza aıt meıramyna sáıkes keldi. Túsirilim alańy retinde Túrkistandy ádeıi tańdap otyrmyz. Óıtkeni Túrkistan Qazaqstannyń eń kóne qalalarynyń biri jáne dereknamasynda halqymyzdyń baı tarıhy jatyr. Sol sebepten de bul qalanyń beınesi bizdiń kartınamyzda qalýy kerek» - dep keltiredi fılmniń rejısseri Rústem Ábdirashevtiń sózderin «Qazaqfılm» kınostýdııasy.
Ekinshi maýsymnyń oqıǵa jelisi Jánibek pen Kereı handardyń Ábilqaıyr Shaıbanı urpaqtarymen Qazaq handyǵynyń Syǵanaqtaǵy taǵy úshin talasy aınalasynda órbıdi. Bul qazaq handyǵyndaǵy eń bir kúrdeli kezeńderiniń biri.
«Jánibekti han kóterý saltanatyn Túrkistannyń mańynda túsiremiz. Dál osy Túrkistan biz túsirip jatqan tarıhı kezeńderdiń shynaıy kýágeri. Ókinishke qaraı, qazaq kınematografynda Sháken Aımanov túsirgen «Aldar kóseden» basqa eshqandaı fılmde Túrkistan qalasy kórsetilmegen eken. Túrkistannan soń Tarazdaǵy Qarahan men Aısha bıbi kesenesin de túsiremiz» - dedi bas prodıýser Arman Asenov.
Esterińizge sala keteıik, tarıhı kınonyń túsirilimderi Almaty oblysynda mamyrdyń basynda bastalǵan. Keıinirek túsirilim toby Ońtústik Qazaqstan oblysy, Túlkibas aýdanyndaǵy «Iir sý» jaılaýynda kólemdi urys sahnalaryn túsirdi.
Kópserııaly fılmdi QR Mádenıet jáne sport mınıstrliginiń tapsyrysy boıynsha «Centaurus Rustem Abdrashev production» JShS-niń qatysýymen Sh.Aımanov atyndaǵy «Qazaqfılm» kınostýdııasy túsirýde.
Fılmniń qoıýshy-rejısseri: Rústem Ábdirashev
Stsenarıı avtorlary: Smaǵul Elýbaı, Tımýr Jaqsylyqov, Rústem Ábdirashev
Qoıýshy sýretshi: Murat Qaripov
Qoıýshy operatorlary: Sapar Qoıshymanov, Aleksandr Plotnıkov
Kostıým jónindegi sýretshi: Ajar Áýbákirova
Grım boıynsha sýretshi: Sergeı Maýrın
Bas prodıýseri: Arman Ásenov
Kompozıtory: Ábilqaıyr Ábdirash
Redaktory: Erlan Tóleýtaı
Basty rólde: Qaırat Kemalov, Erkebulan Daıyrov, Doshan Joljaqsynov, Iisbek Ábilmájınov, Aıan Ótepbergen, Meıirǵat Amangeldın, Nııazbek Shaısultanov, Bekbolat Tileýhan, Arman Qoja, Shuǵyla Saparǵalı, Madına Esmanova, Ǵazıza Tileýbaı, Qarlyǵash Muhamedjanova, Іńkár Ábdirash, Farıza Eskermesova, Álisher Súleımenov jáne basqalar.
Fotosýretter avtory - Nıkolaı Postnıkov
