«Qazaq handyǵy» serıalynyń ekinshi maýsymynyń túsirilimi qashan bastalady
ALMATY. QazAqparat «Qazaq handyǵy» serıalynyń ekinshi maýsymynyń túsirilim jumystary bıylǵy qyrkúıekten bastalady, dep habarlaıdy QazAqparat tilshisi.
Bul týraly búgin «Qazaqfılm» kınostýdııasynda ótken baspasóz máslıhatynda «Almas qylysh» fılmi men «Qazaq handyǵy» serıalynyń rejısseri Rústem Ábdirash aıtty.
«Serıaldyń ekinshi kezeńi «Qazaq handyǵy. Altyn taq» degen ataýmen túsiriledi. Basynda «Qazaq handyǵy. Altyn tuǵyr» degen ataýmen bastamaq bolǵanbyz. Altyn tuǵyrdan «Altyn taq» kommertsııalyq turǵyda ótimdirek bolady dep oıladyq. Oqıǵa jelisi boıynsha, qazaq handarynyń Syǵanaqty qaıtadan qaıtarýy kórsetilmek. Syǵanaqtaǵy Altyn taqty óz enshisi sanap, ózderine qaıtarýy kórsetilmek. Sol jerde Jánibekti han kóteredi. Sebebi, sol joryqta Kereı qaıtys bolady. Ekinshi maýsym Haq-Nazardyń dúnıege kelýimen aıaqtalady», - dedi Rústem Ábdirash.
Kóp serıaly «Qazaq handyǵy» kórkem fılminiń jalǵasy, negizgi túsirilimi QR Mádenıet jáne sport mınıstrligi tapsyrysy boıynsha, Sh.Aımanov atyndaǵy «Qazaqfılm» kınostýdııasynda túsiriletin bolady.
«Ekinshi maýsym túsirilimi Qapshaǵaıdaǵy qalpyna keltirilgen Syǵanaq qalasynda, Jambyl oblysynyń Qulan aýyly mańynda, kóp jylqylar ishinde, sosyn Aısha bıbi, Áziret Sultan basynda, Ulytaýdaǵy Joshy hannyń basynda birqatar epızodtar túsiremiz degen oıymyz bar. Muny bári qarajatqa tireledi», - dedi Rústem Ábdirash.
Eske sala keteıik, Qazaq handyǵynyń 550 jyldyǵyna oraı túsirilgen «Almas Qylysh» fılminiń tusaýkeseri 2017 jyldyń 5 qańtarynda jalpyulttyq prokatqa shyqqan. Tolyqmetrajdy kórkem fılm prokattan 72 mln teńgeden astam qarjy jınady. Al on serıaly «Qazaq handyǵy» tarıhı kınotýyndysy «31 arnadan» naýryz aıynda kórsetilgen bolatyn.
