«Qazaq handyǵy. Altyn taq» tarıhı kartınasy prokatqa shyǵady
ASTANA. QazAqparat - 21 naýryz kúni «Qazaq handyǵy» serıalynyń kınonusqasy - «Qazaq handyǵy. Altyn taq» fılmi jalpyulttyq prokatqa shyǵady, dep habarlaıdy QazAqparat «Qazaqfılmge» silteme jasap.
«Atalǵan aýqymdy jobanyń ekinshi maýsymyn QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen», - delingen habarlamada.
Tarıhqa kóz júgirtsek, XV ǵasyrdyń orta sheninde Shyńǵys han men Ámir Temir ımperııalarynyń qırandysynyń ornyna birneshe ulystar boı kótergen. Orys han taǵyn kúshpen ıelenip, 40 jyl boıy jeke dara bılik qurǵan Ábilqaıyr hannyń aýyr ezgisi - Deshti qypshaq jurtynyń jappaı narazylyǵyn týdyrady. 1465 jyly Kereı men Jánibek sultandar Kók Orda bıleýshisi Ábilqaıyr Shaıbanıge narazy kóshpeli taıpalardy bir týdyń astyna jıyp, Jetisý ólkesinde - «Qazaq Handyǵyn» qurdy. Alaıda Jas ulysty jórgeginde tunshyqtyrǵysy kelgen Ábilqaıyr han, ata jaýy Kereı men Jánibekke qarsy joıqyn joryqqa attandy. Alda uly maıdan kútip turǵan edi. Al Kereı han men Jánibek sultannyń basty maqsaty -Syǵanaqtaǵy altyn taqty qaıtaryp alý bolatyn.... Osy tarıhı oqıǵalardy «Qazaq handyǵy. Altyn taq» tarıhı kartınasynan kóre alasyz.
Tarıhı kınodılogııa Іlııas Esenberlınniń «Kóshpendiler» trılogııasynyń birinshi romany boıynsha túsirilgen.
Fılmniń rejısseri -Rústem Ábdirashov. Ol «Quraq kórpe», «Qaladan kelgen qyz», «Stalınge syılyq», Elbasy joly kınoepopeıasynyń: «Balalyq shaǵymnyń aspany», «Ot-ózen», «Temirtaý», «Tyǵyryqtan jol tapqan» jáne «Qazaq handyǵy. Almas qylysh» atty kınotýyndylarynyń avtory.
Eske sala ketsek, Astanada jaqynda «Qazaq handyǵy. Altyn taq» fılminiń tusaýkeseri ótken bolatyn.
