«Qazaq handyǵy. Almas qylysh» fılmin Rımdegi kórermender tamashalady
ASTANA. QazAqparat - Sh.Aımanov atyndaǵy «Qazaqfılm» AQ qoldaýymen Qazaqstannyń Italııadaǵy elshiligi Rım qalasynda «Juldyzdar toǵysqanda», «Qazaq handyǵy. Almas qylysh» jáne «16 qyz» fılmderiniń kórsetilimin uıymdastyrdy, dep habarlaıdy QazAqparat tilshisi kınostýdııanyń baspasóz qyzmetine silteme jasap.
Shara Qazaqstannyń elordasy Astana qalasynyń 20 jyldyq mereıtoıyna oraı ótkizilip otyr. Kórsetilim aldynda kórermen aldynda sóz sóılegen Elshilik ókilderi, sondaı-aq Italııanyń mádenıet jáne óner qaıratkerleri Qazaqstan men Astana qalasy damýynyń deńgeıine jáne otandyq kınematografııa salasyna joǵary baǵa berdi.
Italııa tilinde sýbtıtrleri bar fılmdi tamashalaǵan kórermender halqymyzdyń tarıhyna úlken qyzyǵýshylyqtaryn bildirdi. Aıta ketsek, Rımniń tarıhı aýdandarynyń birinde ornalasqan Casa del Cinema kınoteatrynda bul kúni bos oryn bolmady. Jınalǵan óner súıer qaýym otandyq kınotýyndalardy jaqsy qabyldap, qazaq mádenıeti jáne ónerimen etene tanysý týraly óz oılaryn bildirdi.
Qazaq handyǵynyń 550 jyldyǵyna oraı túsirilgen «Qazaq handyǵy» kınoserıalynyń kınonusqasy - «Almas qylysh» fılmi Qazaqstan Táýelsizdiginiń 25-jyldyǵyna oraı eń alǵash Astana qalasynda kórsetilgen bolatyn. Bul aýqymdy jobanyń ıdeıa avtory QR Prezıdenti N.Á.Nazarbaev. Fılmniń stsenarııi Іlııas Esenberlınniń «Almas qylysh» romanynyń negizinde jazylǵan.
«Elbasy joly» kınoepopeıasynyń jalǵasy - rejısser Sergeı Snejkın túsirgen «Juldyzdar toǵysqanda» fılmi Keńes odaǵynyń ydyraýy, jańa táýelsiz memleketterdiń paıda bolýy, onyń ishinde Qazaqstan Respýblıkasy týraly baıandaıdy. Aǵylshyn jazýshysy Djeremı Vılson Qazaqstan Prezıdenti Nursultan Nazarbaevtyń ómirbaıanyn jazý úshin onymen kezdesýge qol jetkizedi. Alaıda jýrnalıst pen Elbasynyń belgilengen suhbaty búkil eldi aralaýmen, tarıhqa kóz júgirtken uzaq ýaqytqa sozylǵan qyzyqqa toly saıahatqa ushtasady.
«On alty qyz» fılmi ata-anasy úılendirýdi armandaıtyn Baýyrjan esimdi jas jigittiń oqıǵasyn baıandaıdy. Ákesi Baýyrjandy dosynyń qyzy Aıjanmen «bel quda» salty boıynsha atastyrady. Degenmen qyzdyń keıin basqa jigiti bar bolyp shyǵady. Dosynyń kóńilin qaldyrǵysy kelmegen Aıjan Baýyrjanǵa qalyńdyq izdeı bastaıdy. Keıinnen olardyń qarym-qatynasy mahabbatqa ulasady.
Kórsetilimnen keıin qonaqtar Qazaqstan men Astana qalasy týraly daıyndalǵan otandyq ımıdjdik beınematerıaldardy kórip tamashalady.
