Qazaq handyǵyna arnalǵan tórtinshi tomnyń qoljazbasy qaıta qaraldy - Qarın
ASTANA. KAZINFORM — Almatyda Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaktsııa alqasynyń kezekti otyrysy ótti.
Buǵan deıin alqa músheleri ejelgi kezeńge, túrik dáýirine jáne Altyn Ordaǵa arnalǵan tomdardy qarastyryp, bekitken bolatyn. Іrgeli eńbekti ázirleý barysynda júıelilik pen sabaqtastyq qatań saqtalyp otyrǵanyn aıta ótken jón. Osy jolǵy otyrysta Qazaq handyǵy kezeńine arnalǵan tórtinshi tomnyń qoljazbasy qaraldy.
Tomnyń jańartylǵan tujyrymdamasyn, qurylymy men mazmunyn basylymnyń úılestirýshisi, tarıh ǵylymdarynyń doktory, Sh.Sh. Ýálıhanov atyndaǵy Tarıh jáne etnologııa ınstıtýtynyń dırektory, akademık Zııabek Qabyldınov tanystyrdy.
Otyrysta Parlament depýtaty, tarıh ǵylymdarynyń doktory, professor Erkin Ábildiń, tarıh ǵylymdarynyń kandıdaty, ál-Farabı atyndaǵy Qazaq ulttyq ýnıversıteti túlekteri qaýymdastyǵynyń atqarýshy dırektory Kúlgazıra Baltabaevanyń, «Qazaq tarıhı qoǵamynyń» basqarma tóraǵasy Radık Temirǵalıevtiń retsenzııalary tyńdaldy.
Sonymen qatar Hankeldi Ábjanov, Aıdos Sarym, Aıgúl Sádýaqasova, Murat Ábdirov, Galına Ksenjık, Bereket Káribaev, Mámbet Qoıgeldıev, Jaqsylyq Sábıtov, Orazaq Smaǵulov, Aıbolat Kúshkimbaev, Sábıt Shildebaı, Aqan Ońǵaruly, Berik Ábdiǵalıuly sekildi redaktsııa alqasynyń basqa da músheleri óz oı-pikirin ortaǵa saldy. Retsenzentter men alqa músheleri tórtinshi tom boıynsha júrgizilip jatqan jumys birshama ilgerilegenin atap ótti ári qoljazbanyń jańa qurylymy men mazmunyn talqylady.
Redaktsııa alqasy Qazaq handyǵy kezeńine arnalǵan tomnyń qoljazbasyn odan ári jetildirip, jeltoqsanda ótetin otyrysta qaıta qarastyrý jóninde sheshim qabyldady.
Aıta keteıik, Qazaqstan tarıhynyń jeti tomdyǵy negizinde mektepke arnalǵan oqý baǵdarlamasy jasalady.