Qazaq handarynyń ultqa sińirgen ushan-teńiz eńbegi árdaıym el esinde saqtalady - N. Nazarbaev

ASTANA. QazAqparat - Qazaq órshil rýhy men ulttyq kelbetin eshqashan joǵaltqan emes. Bul týraly búgin Astanadaǵy Táýelsizdik saraıynda Qazaq handyǵynyń 550 jyldyǵyna arnalǵan saltanatty jıynda Elbasy Nursultan Nazarbaev málim etti.

«Qazaq handyǵy kezeńi - at jalynda kún keshken Alash jurtynyń qaharmandyq dáýiri edi. El bılegen handardyń ómiri maıdan shebinde ótti. Qazaqtyń alǵashqy 14 hanynyń jeteýi joryq jolynda qaza tapty. Osynaý uly babalardyń bıik rýhyna barlyq urpaq aıryqsha qurmetpen bas ıip, rızashylyǵyn bildiredi», - dedi Prezıdent.

Bul turǵyda Elbasy handardyń ultqa sińirgen ushan-teńiz eńbegi árdaıym el esinde saqtalatyndyǵyn qadap aıtty.

«Birliktiń qadirin bilip, bilekke bilek qosqanda atamekendi jaýdan azat ettik. Alaıda, aǵaıynnyń arazdyǵy, yntymaǵynyń azdyǵynan Qazaq handyǵy joıyldy. Danyshpan Abaı aıtqandaı: «Bas- basyna bı bolǵan óńkeı qıqym, minekı, buzǵan joq pa, eldiń sıqyn» demekshi, sol kezde búkil dúnıejúzin jaılaǵan «bólip al da, bıleı ber» atty otarshylyqqa negizdelgen surqııa saıasat Qazaq elin birjolata Reseı patshalyǵynyń otaryna aınaldyrdy», - dedi Memleket basshysy.

Osy oraıda N. Nazarbaev sol kezderi elimiz qansha qıyndyq kórse de, azattyq ańsaǵan órshil rýhy men ulttyq kelbetin eshqashan joǵaltpaǵandyǵyn qadap aıtty.

«Abylaıdyń asyl armandary Táýelsizdik tusynda túgel oryndaldy dep aıta alamyz», - dedi Memleket basshysy.