Qazaq halqynyń ultaralyq shydamdylyq qasıeti - onyń shynaıy bolmysy - Qazaqstan halqy assambleıasy
ASTANA. Mamyrdyń 28-i. QazAqparat /Arman Asqarov/ - Astanadaǵy Lev Gýmılev atyndaǵy Eýrazııa ulttyq ýnıversıtetinde TMD elderi tarıhshylarynyń «Tarıhtan - qazirgi zamanǵa» atty Halyqaralyq ǵylymı-tájirıbelik konferentsııasy ótýde,
dep habarlaıdy QazAqparat.
Konferentsııany ashqan Qazaqstan halqy assambleıasy tóraǵasynyń orynbasary Eraly Toǵjanov alǵash ret ótkizilip otyrǵan tarıhshylar forýmy aıasynda ortaq tarıhty zertteý jáne oǵan jańasha turǵydan úńilý máselesin erekshe atap ótti. «Osy tarıhtyń bárimizge ortaq tusy ol - qýǵyn-súrgin jyldary. Sol kezde qazaq halqy álsiregen joq. Onyń, ultaralyq shydamdylyq qasıeti totalıtarlyq rejımniń nusqaýymen emes, onyń shynaıy bolmysy negizinde kórindi. Qazaq halqy qonys aýdarǵan ulttardyń tilin túsinbese de, olarmen bir úzim nandy bólisip, baspana berdi. Qylyshynan qan tamǵan totalıtarızm júıesi bundaı áreketterdiń qylmys retinde qarastyrsa da, qazaq halqy qýǵynǵa ushyraǵan otbasylarǵa kómek berýden taıynbady. Bul meniń sózim emes, bul - tarıhtyń sózi. Qazirgi kezde bul tarıh bizdiń ultaralyq kelisimniń negizin qurap otyr», - deıdi E.Toǵjanov.
Aıta keteıik, «Tarıhtan - taǵylym, ótkenge - taǵzym» halyqaralyq jobasy aıasynda uıymdastyrylyp otyrǵan konferentsııa barysynda «30-50 jyldardaǵy Qazaqstan halyqtarynyń deportatsııasy» jáne «KarLAG» ǵylymı jobalarynyń tanystyrylymy ótedi.
