Qazaq halqynyń tarıhy men ádet-ǵurpyn «NOMADS» onlaın-oıyny arqyly zerdeleýge bolady
ASTANA. QazAqparat - Qazaq halqynyń tarıhy men ádet-ǵurpyn «NOMADS» onlaın-oıyny arqyly zerdeleýge bolady. Bul týraly búgin alǵashqy qazaqstandyq braýzerlik «NOMADS» tusaýkeserinde belgili boldy.
«Búginde ǵalamtorda onlaın-oıyndar óte kóp, alaıda ulttyq ónim joq. Sondyqtan da ótken jyly oıyndardy qurastyrýshy Áset Ospanovtyń oıyna qazaq tilindegi braýzerlik oıyndy qurastyrý ıdeıasy keledi. Ótken jyly qazan aıynda bizdiń «KazBussinesMedia» qory bul bastamany qoldap, oıyndy qurastyrýǵa kiristik. Oıyn tolyǵymen ejelgi túrkiler men qazaqtardyń tarıhyna negizdelgen. Ony qazaqstandyq mamandar jasaǵan. Oıyndy qurastyrýǵa sheteldik mamandar tartylǵan joq», - dedi «KazBussinesMedia» qoǵamdyq qory keńesiniń tóraǵasy Asqar Omarov.
Onyń sózine qaraǵanda, 2 aı buryn áleýmettik jelilerde oıynnyń ilki nusqasy qosylǵan. «Oıyn eki tilde - qazaq jáne orys tilderinde daıyndaldy. Bolashaqta aýdıtorııany keńeıtip, TMD elderiniń geımerlerin tartý kózdelgen. Oıynnyń ózbek jáne qyrǵyz tilderindegi nusqalaryn jasap Ortalyq Azııanyń ınternet keńistigine deıin shyǵý josparlanǵan. Sondaı-aq bashqurt geımerleri de qyzyǵýshylyq tanytýda. Olar oıyndy bashqurt tiline aýdarýǵa septesýge nıetti», - dedi A.Omarov.
Oıynnyń avtory Áset Ospanov aýdıtorııaǵa qalaı tirkelip, oıyndy qalaı bastaý kerektigin úıretti. Ol oıyn keıipkerleri dala batyrlary men saqshylary ekenin jetkizdi. Munda qazaqtyń qarý-jaraqtary dál qalpynda kompıýterlik nusqada jasalǵan. Oıyndy ázirleýshiler atap ótkendeı, olar ony ári qaraı jetildiretin bolady.
