Qazaq halqynyń salt-dástúrine erekshe mán beremin - tsırk ártisi Týngalat Oselbaeva
ASTANA. QazAqparat - Qazaq halqynyń salt-dástúrin erekshe qasterleımin. Bul týraly búgin Aqordada Halyqaralyq áıelder kúnine oraı Elbasy Nursultan Nazarbaevpen ótken kezdesýden keıin tsırk ártisi Týngalat Oselbaeva málim etti.
Mereke qarsańyndaǵy bul kezdesý óte jaqsy ótkenine toqtalǵan ol: «Osynda shaqyrtylǵan názik jandylardyń barlyǵy aıryqsha qurmet úshin qanattanyp shyqty. Búgin alǵash ret Prezıdentpen betpe-bet kezdesip otyrmyn jáne Elbasyny qarapaıym, ashyq adam retinde tanydyq. Sondyqtan men úshin bıylǵy mereke aıryqsha ótip jatyr dep aıtamyn», - dedi.
«Qabyldaý kezindegi áńgime barysynda Memleket basshysy meniń qyzmetime tańǵalyp, arystandardy neshe aılyǵynan bastap úıretesińder dep surady. Men óz kezegimde keıbir arystandy 3-5 aılyq kezinen, al keıbirin 1,5 jas kezinde alatyndyǵymyzdy aıttym»,-dedi ol.
Aıta keteıik, 47 jasar T. Oselbaeva - Qazaqstanda arystandardy úıretýshi jalǵyz áıel. Ol búginde astanalyq tsırkte qyzmet etedi. Ártistiń týǵan jeri - Býrıatııa Avtonomdy Respýblıkasy.
