Qazaq halqynyń kóńiliniń keńdiginiń arqasynda basqa ult ókilderi tatý ómir súrip jatyr - Asyly Osman
Ǵalymnyń aıtýynsha, qazaq halqynyń kóńiliniń keńdigi, taza peıili, darhandyǵynyń arqasynda qazaq jerinde búginde birtalaı ult ókilderi tatý tátti, bir shańyraq astynda ómir súrip keledi.
«Qazirgi tańda qazaqtan basqa ózge ultty ózimen teń kórip otyrǵan basqa qandaı qaı el bar álemde?! Sondyqtan men búginde Qazaqstandaǵy ulttar dostyǵy ózge elderge shyn máninde úlgi bola alady dep aıta alamyn. Degenmen, bárimizge osy bereke-birligimizdi saqtap, ony ary qaraı damytý kerek. Ol úshin bizge taza nıet, yqylas kerek», - dedi ǵalym.
Til janashyry qazaq tiliniń búgingi haline kóńili tolmaıtynyn jasyrǵan joq.
«Shyn aıtaıyn, qazaq tiliniń búgingi hali meniń kóńilimdi qýantpaıdy. Ulttyń jany, rýhynyń úni, eń qundy dúnıesi onyń tili. Sizdiń tarıhyńyzdy, ádebıetińizdi, mádenıetińizdi de ary qaraı jalǵastyratyn kómeıdegi sóz benen tańdaıdaǵy til ǵana. Biraq, sonda da shúkirshilik etemin. Qazaq tiliniń aıasy keńeıip, damyp keledi»,- dedi ol.
Sondaı-aq, Asyly Osman Qazaqstan halqy Assambleıasy jaıyndaǵy óz oıyn jetkizdi.
«Menińshe Qazaqstan halqy Assambleıasy Qazaqstanda kemshin tartyp jatqan dúnıelerdi Prezıdent pen halyq aldyna shyǵarýy kerek. Sebebi, ol Qazaqstandaǵy ózge ult ókilderiniń basyn qosqan uıym. Budan bólek, Assambleıa músheleri qazaqtyń, qazaq ultynyń tóńiregine toptasýy kerek», - dedi ǵalym.
Ol sondaı-aq, Qazaqstanda ary qaraı da ultaralyq dostyq bolýy úshin qazaq halqyn qadirlep, syılaı bilý kerek ekenin alǵa tartty.
«Biz bárimiz qazaq halqynyń tóńiregine toptasýymyz kerek, onyń boıyndaǵy adamı asyl qasıetterin uǵyp, túsinýimiz kerek, ol úshin qazaq tilin bilýimiz kerek. Men qazaq halqynyń tazalyǵyna, adaldyǵyna eshteńeni teńeı almaımyn. Myna eldiń ıesi de, kıesi de qazaq. Tóle bı babamyz: «Ydyraý zaman qasıeti, birigý ata-baba ósıeti», - degen eken. Bárimiz osy ósıetti oryndaýymyz kerek. Sondaı-aq, Tóle bı: «Halqyńa ádil bol, dushpanyńa qatal bol, dosyńa adal bol»,- dep aıtqan. Qazirgi ýaqytta halyq pen bılik bir-birin túsinýi kerek. Sonda elimiz ary qaraı da damı beredi. Qazaq tilin bárine ortaq til etýge atsalysý kerek», - degen oıyn jetkizdi Asyly Osman.
Qoǵam qaıratkeri qańtar oqıǵasy kezinde Prezıdenttiń batyl sheshimderi el tynyshtyǵyn saqtaýda úlken ról oınaǵanyn da atap ótti.
«Táýelsizdikke 30 tolǵanda, mundaı qasiretti kórý úlkenge de, kishige de óte aýyr boldy. Memleket basshysy sol bir qıyn-qystaý tusta óte durys sheshim qabyldady. Áıtpese, biz qazir osylaı otyrar ma edik, memleketimizden ajyrap qalar ma edik? Sondyqtan men Prezıdenttiń sol kezdegi sheshimin qoldadym ári jón sanadym. Mysaly, elimizge Ujymdyq qaýipsizdik týraly shart uıymynyń (UQShU) áskeri kelip, bizdiń mańyzdy nysandarymyzdy qorǵady. Jalpy, Toqaev qıyn sátte halqymen birge bolatynyn kórsetti. Sol kezde: «Men elordadan eshqaıda ketpeımin»,- dedi. Al ol kezde shynymen de qorqynyshty boldy ǵoı. Sondaı-aq ol Prezıdent bolǵan kúnnen bastap, qoǵamda ádildiktiń ornaýyna kóńil bólip keledi. Al ádildik pen shyndyqqa esh nárse jetpeıdi. Sondyqtan men Memleket basshysy Qasym-Jomart Toqaevtyń saıasatyn qoldaımyn», - dep óz oıyn bildirdi Qazaqstan halqy Assambleıasynyń múshesi Asyly Osman.